Джонсан: Поўнае вызваленне Украіны можа адбыцца ўжо сёлета
1- 31.01.2023, 21:15
- 5,638
Дапамога Кіеву мае ісці без затрымак.
Былы прэм'ер-міністр Вялікай Брытаніі Борыс Джонсан выказаў цвёрдае перакананне, што вайна ва Украіне з поўным вызваленнем яе тэрыторый можа закончыцца ў 2023 годзе, і гэта найлепшы варыянт не толькі для Украіны і Захаду, але таксама для Расеі.
Аб гэтым ён сказаў у аўторак падчас сустрэчы з журналістамі ва Украінскім доме ў Вашынгтоне, перадае «Укрінфарм».
"Мы маем зрабіць так, каб нашы ўкраінскія сябры атрымалі тое, што ім трэба, каб як мага хутчэй выгнаць расейцаў з усёй тэрыторыі Украіны", – адзначыў Джонсан, дадаўшы, што дапамога мае ісці без затрымак.
Ён выказаў перакананне, што вызваленне ўкраінскіх тэрыторый "можа адбыцца ў гэтым 2023 годзе", і гэта найлепшы варыянт не толькі для Украіны.
"Я думаю, што гэта лепш для Захаду, але таксама і для Расеі", - адзначыў экс-прэм'ер.
Ён падкрэсліў, што з «катастрофай», якую зладзіў Пуцін, трэба скончыць як мага хутчэй.
«Тое, што робяць украінцы - і я бачыў гэта на свае вочы некалькі разоў - гэта барацьба ад імя ўсіх (нас), яны змагаюцца за свабоду ва ўсім свеце, яны ваююць за людзей у Грузіі ды Малдове, у краінах Балтыі ды Польшчы - усюды, дзе існуе рызыка расейскага рэваншызму або жаданне пабудаваць старую савецкую імперыю», - падкрэсліў Джонсан.
Таму, сказаў далей экс-кіраўнік брытанскага ўрада, ён застаецца заўзятым прыхільнікам Украіны.