Былую рэдактарку Першага канала Марыну Аўсяннікаву прысудзілі да 8,5 гадоў калоніі

Пастанову вынес Басманны суд Масквы.

Басманны суд Масквы завочна прысудзіў былую рэдактарку праграмы «Время» на Першым канале Марыну Аўсяннікаву да васьмі з паловай гадоў калоніі, прызнаўшы яе вінаватай у «распаўсюдзе фэйкаў» аб Узброеных сілах РФ («д» ч. 2 арт. 207.3 КК РФ). The Moscow Times.

«Суд прысудзіў Аўсяннікаву да васьмі гадоў і шасці месяцаў пазбаўлення волі з адбываннем пакарання ў папраўчай калоніі агульнага рэжыму», - паведамілі ў пракуратуры Масквы.

Таксама суд пазбавіў яе права цягам чатырох гадоў адміністраваць сайты і старонкі ў сацыяльных сетках. Дзяржабвінавачанне прасіла прызначыць Аўсяннікавай дзевяць з паловай гадоў калоніі.

Справу супраць журналісткі распачалі пасля яе пікету на Сафійскай набярэжнай 15 ліпеня 2022 года. На яго яна выйшла з плакатам, на якім было напісана: «Пуцін - забойца, яго салдаты - фашысты. 352 дзіцяці загінулі. Колькі яшчэ павінна загінуць дзяцей, каб вы спыніліся?».

У жніўні таго ж года Аўсяннікаву адправілі пад хатні арышт, але журналістка адмовілася выконваць меру стрымання, назваўшы сябе невінаватай. У кастрычніку яна ўцякла з-пад хатняга арышту ў Францыю.

Марына Аўсяннікава стала вядомая пасля таго, як у сакавіку 2022 года выйшла з антываенным плакатам у жывым эфіры «Першага канала». Тады на яе склалі пратакол за «дыскрэдытацыю» расейскага войска і затрымалі.

Перад выхадам у жывы эфір з антываенным плакатам Аўсяннікава запісала відэазварот, у якім яна асудзіла вайну Расеі супраць Украіны.