УСУ адкінулі лінію фронту ў Чорным моры на 185 км

Расейскія караблі баяцца заплываць за мыс Тарханкут.

Сілы абароны Украіны адкінулі лінію фронту ў Чорным моры прыкладна на 185 км ад кантраляванага ўрадам узбярэжжа Украіны. Цяпер варожыя расейскія караблі фактычна не курсуюць у кірунку тэрытарыяльных вод Украіны.

Яны могуць з'яўляцца ля крымскага ўзбярэжжа, аднак не рызыкуюць заплываць за мыс Тарханкут. Пра гэта расказала начальніца Аб'яднанага прэсавага цэнтра Сіл абароны Поўдня Наталля Гумянюк у эфіры тэлемарафона.

«Лінія фронту ў моры ўжо даўно была адкінутая на мінімум 100 марскіх міль (185 км — рэдакцыя) ад кантраляванага Украінай берага. Цяпер караблі і катэры Чарнаморскага флоту РФ фактычна не курсуюць у кірунку тэрытарыяльнага мора Украіны. Час ад часу з'яўляюцца ля ўзбярэжжа Крыму, але не бліжэй. За мыс Тарханкут яны не важацца выходзіць», — адзначыла Гумянюк.

Паводле ейных слоў, на пачатку поўнамаштабнага ўварвання варожыя караблі набліжаліся да Адэскай вобласці на адлегласць артылерыйскага ўдару. Аднак пасля таго, як Сілы абароны патапілі флагман Чарнаморскага флота РФ крэйсера "Масква", яны здалелі таксама адкінуць увесь расейскі флот ад кантраляванага ўзбярэжжа.

Цяпер сваю перавагу ў Чорным моры вораг спрабуе дэманстраваць з дапамогай тактычнай авіяцыі.

Акрамя таго, Гумянюк дадала, што на працягу 3 кастрычніка расейцы двойчы атакавалі востраў Змяіны кіраванымі авіябомбамі. Па два-тры такія баявыя прыпасы апошнім часам захопнікі скідаюць на Змяіны штодзень.