Сын «новага старога сябра» Лукашэнкі зняў апартаменты за $75 тысяч на дзень

У яго краіне людзі жывуць на $2 за дзень.

Сын афрыканскага дыктатара зняў апартаменты ў Нью-Ёрку за 75 000 даляраў за дзень. Грамадзяне яго краіны жывуць на два даляры за дзень, піша «Зеркало» са спасылкай на BILD.

55-гадовы Тэадора Нгема Абіянг Мангу - першы віцэ-прэзідэнт Экватарыяльнай Гвінеі. Яго бацька - 81-гадовы прэзідэнт Тэадора Абіянг Нгема Мбасага>, кіруе ўжо 44 гады. Нядаўна сын прыехаў у Нью-Ёрк на паседжанне ААН і спыніўся ў раскошным пентхаўсе на Манхэтэне. Арэнда каштуе 75 000 даляраў за дзень. Палітык сам апублікаваў фота ў раскошнай кватэры ў сацсетках.

У самой Экватарыяльнай Гвінеі грамадзяне жывуць у сярэднім на 2 даляры за дзень. Больш за 60% насельніцтва пакутуе ад голаду. Толькі палова жыхароў маюць доступ да чыстай пітной вады, а 7,9% дзяцей паміраюць, не дажыўшы да пяці гадоў. Квітнее гандаль людзьмі і рабства. Праваахоўнікі ЗША мяркуюць, што віцэ-прэзідэнт атрымлівае значную частку багаццяў ад карупцыйных угодаў, звязаных з запасамі нафты і газу краіны. Ён валодае нерухомасцю ў Парыжы, Маямі і ПАР, а таксама раскошнымі аўтамабілямі.

Хто кіруе Экватарыяльнай Гвінеяй і пры чым тут Беларусь

Тэадора Абіянг Нгема Мбасага прыйшоў да ўлады ў 1979 годзе, зрынуўшы дыктатарскі рэжым свайго дзядзькі, і з таго часу кіруе краінай.

У 2012 годзе віцэ-прэзідэнтам стаў яго сын Тэадора Нгема Абіянг Мангу. У 2016 годзе прэзідэнта пераабралі на новы сямігадовы тэрмін, а Тэадора Нгема Абіянг Мангу атрымаў пасаду першага віцэ-прэзідэнта. У адпаведнасці з заканадаўствам краіны ў выпадку смерці бацькі ён зойме яго пост.

Пяць гадоў таму дакладчык ААН быў «вельмі ўстрывожаны арыштамі і змяшчэннем пад варту больш чым сотні лідараў і чальцоў апазіцыі пасля парламенцкіх выбараў у лістападзе 2017 года, а таксама няўдалай змовы аб перавароце, аб якім урад абвясціў у студзені».

Вінаваціўся ў канібалізме з боку сваіх палітычных апанентаў. У верасні 2016 г. за публікацыю артыкула пра гэта быў затрыманы галоўны рэдактар ліберыйскай газеты New Democrat.

За час кіравання Мбасага ў краіне ўстанавіўся культ яго асобы. У 2003 годзе дзяржаўнае радыё абвясціла, што ён «падобны Богу на нябёсах» і знаходзіцца «ў сталым кантакце з Усемагутным», валодаючы «ўсёю ўладай над людзьмі і рэчамі». У 2013 годзе КНДР узнагародзіла Мбасога прэміяй імя Кім Чэн Іра.

У пачатку верасня Тэадора Абіянг Нгема Мбасага наведаў Беларусь. На сустрэчы з Лукашэнкам ён заявіў, што «дагэтуль на Афрыканскім кантыненце працягвае існаваць крайняя галеча», бо «імперскія нэакаланіяльныя сілы працягваюць эксплуатаваць нашы краіны».