Расея вяртаецца да рэалій савецкіх часоў
19- 28.11.2023, 12:39
- 28,738
![Расея вяртаецца да рэалій савецкіх часоў](https://i.c97.org/ai/573304/aux-head-1701157396-20231128_pucin_360.jpeg)
Пуцін падпісаў важны дакумент.
Расейскі дыктатар Уладзімір Пуцін у панядзелак, 27 лістапада, падпісаў закон аб федэральным бюджэце РФ на 2024 год. У дакуменце, які раней прыняла расейская Дзяржаўная дума і зацвердзіла Рада федэрацыі, сказана, што на "нацыянальную абарону" агрэсар налета выдаткуе 10,775 трыльёна рублёў.
Аб гэтым піша The Moscow Times. Гэтая лічба на 70% большая, чым у 2023-м (6,8 трлн), у 2,3 разы большая, чым у 2022-м (4,7 трлн), і ў 3 разы вышэйшая за паказчык 2021-га года (3 ,5 трлн), калі РФ яшчэ не пачала поўнамаштабную вайну супраць Украіны.
Акрамя таго, варта адзначыць, што ў Расеі ўпершыню з часоў СССР накіруюць амаль траціну ўсяго бюджэту краіны на ўтрыманне войска і абаронна-прамысловага комплексу.
Агульная сума бюджэту РФ на 2024 год складзе 36,66 трыльёна рублёў. З іх на абарону пойдуць 10,775 трыльёна, гэта значыць 29,5%. Пры гэтым у бюджэт 2023 года першапачаткова было закладзена 19% выдаткаў на абарону (5 трыльёнаў з 26,1 трыльёна рублёў), а ў 2022 годзе гэтая доля складала 17% (4,7 трыльёна з 27,8 трыльёна рублёў).
Калі ж дадаць сюды выдаткі на «нацыянальную бяспеку», куды зашытыя бюджэты МУС, Расгвардыі, спецслужбаў і сістэмы ФСВП, на якія ў наступным годзе выдадуць 3,338 трыльёна рублёў, то агулам на ўзброеныя структуры ў РФ будзе выдаткавана амаль 40% бюджэту.
Такім чынам, краіна-тэрарыст вяртаецца да рэалій савецкага часу. СССР у свае апошнія гады марнаваў на абарону траціну свайго бюджэту. Так, у бюджэце на 1990 год на "вайсковыя мэты" быў закладзена 71 мільярд з 241,3 мільярда рублёў, гэта значыць 29,4% ад усяго бюджэту.