«У беларускага выкладніка 20 гадзінаў каштуюць, як у польскага – 5–10»

Беларусы, якія эмігравалі ў Польшчу, расказалі пра сваё навучанне.

Еўрапейская адукацыя застаецца каштоўнасцю, дзеля якой многія пераязджаюць у Еўропу. Але ёсць і тыя, хто, эміграваўшы ў Польшчу, прадаўжаюць вучыцца ў Беларусі – завочна або анлайн.

Беларусы расказалі MOST, чаму зрабілі такі выбар.

«У Польшчы ўсе варыянты былі ад 15–20 даляраў, а ў Беларусі плачу 40 рублёў»

Дар'я бярэ індывідуальныя анлайн-заняткі ангельскай мовы ў рэпетытаркі, якая працуе ў Беларусі.

– Так выходзіць танней, – тлумачыць дзяўчына. – Першапачаткова я шукала рэпетытара ў Польшчы, але ўсе варыянты былі ад 15–20 даляраў і вышэй за занятак. А ў Беларусі я плачу 40 рублёў (12,9 даляра паводле курсу, вызначанага на гандлі БВФБ 28 лістапада. – Заўвага). Пры выбары арыентавалася, вядома, не толькі на кошт: зважала на досвед рэпетытара і на водгукі.

Дар'я выбрала даволі цікавы спосаб аплаты за заняткі. Дзяўчына просіць аплачваць іх сваіх родных, а калі прыязджае ў Беларусь, альбо прывозіць ім нешта з Польшчы на гэтую суму, альбо аддае грошы гатоўкай. А часам проста заказвае для родных што-небудзь на сайце беларускай інтэрнэт-крамы і аплачвае замову польскай картай.

«Навучанне ў разы цікавейшае і інфармацыйнае»

Вікторыя (імя змененае) працуе ў Польшчы спецыялісткай таргетаванай рэкламы – займаецца прасоўваннем праз рэкламны кабінет у Facebook. Адзін-два разы на год дзяўчына праходзіць навучанне ў наладзе таргетаванай рэкламы, каб заставацца ў курсе новаўвядзенняў і пераймаць досвед сваіх калегаў.

– У Польшчы курсы таргету я праходзіла неаднаразова і магу адназначна сказаць, што беларускае навучанне ў разы цікавейшае, інфармацыйнае і таннейшае, чым польскае. Таму я заўжды выбіраю беларускіх калегаў.

Вікторыя ўдакладняе, што 20 гадзінаў відэаматэрыялу ў беларускага выкладніка каштуюць 400 еўраў, а ў польскага столькі ж давядзецца аддаць за 5–10 гадзінаў.

– Калі гаварыць пра сістэму навучання, то беларускія і польскія курсы падобныя. І ў тым, і ў другім выпадку запісаныя курсы заліваюцца на навучальную анлайн-платформу, вучні праглядаюць матэрыял і задаюць пытанні ў чатах, а куратары правяраюць хатнія заданні. Але ёсць адно істотнае адрозненне. Беларускія выкладнікі не толькі навучаюць наладзе таргетаванай рэкламы, але і ўключаюць у свае праграмы ўрокі маркетынгу. У польскіх выкладнікаў такога я не сустракала: яны навучаюць выключна тэхнічным момантам.

«Я адзіная ў групе, хто падключаецца да заняткаў анлайн»

Кацярына праходзіць трэці год навучання на гештальт-тэрапеўта. Пачынала дзяўчына ў Беларусі, але пасля вымушанага пераезду ў Польшчу вучыцца адразу ў дзвюх краінах.

– У Беларусі я наведвала групавыя заняткі афлайн. Але цяпер давялося перайсці на анлайн-навучанне. Я адзіная ў групе, хто падключаецца да заняткаў анлайн.

Кацярына расказвае, што навучанне на гештальт-тэрапеўта прадугледжвае шэраг дадатковых курсаў. Дзеля гэтага дзяўчына наведвае заняткі ў Польшчы, але і ў гэтай краіне вучыцца ў беларускіх выкладнікаў.