Завошта Лукашэнка звольніў свайго памочніка: ці пагражае Брыло смяротнае пакаранне?

Дакладная роля Брыла ў «малочнай справе» дагэтуль не названая.

Лукашэнка звольніў свайго памочніка за неназваную правіну, «несумяшчальную са знаходжаннем на дзяржаўнай службе». Хто гэты памагаты, што з ім здарылася, чаму яго арыштаваў беларускі КДБ? У гэтых пытаннях разбіраўся сайт news.ru.

Хто такі дарадца Лукашэнкі Брыло

Прэсавая служба Лукашэнкі паведаміла аб вызваленні ад пасады інспектара кіраўніка дзяржавы ў Віцебскай вобласці Ігара Брыло. Указ быў падпісаны Лукашэнкам 24 лістапада. Брыло быў прызначаны на гэтую пасаду роўна чатыры месяцы таму, 28 ліпеня 2023 года. У той жа дзень Брыло вызвалілі з пасады міністра сельскай гаспадаркі і харчавання. На гэтай пасадзе ён знаходзіўся з лютага 2022 года, а да гэтага з 2013 года быў намеснікам міністра і першым намеснікам міністра.

Што здарылася з Брыло, чаму звольнілі

Прэсавая служба Лукашэнкі не называла прычыны адхілення Ігара Брыло з пасады памочніка прэзідэнта — інспектара ў Віцебскай вобласці, і якую «правіну» ён учыніў, застаецца невядомым.

Раней стала вядома, што 22 лістапада Брыла знік са свайго працоўнага месца і знайшоўся ў следчым ізалятары КДБ. Паводле выдання «Наша Нiва», экс-кіраўнік Мінсельгаса быў затрыманы ў рамках так званай «малочнай справы», галоўным фігурантам якой стаў дырэктар найбуйнейшага вытворцы малочнай прадукцыі ў краіне ААТ «Бабушкіна крынка» Генадзь Скітаў. У мінулым, калі Скітаў узначальваў мясакамбінат у Барысаве, малады Брыло быў ягоным падначаленым, а ўжо пасля пайшоў на павышэнне і пад 2022 год дайшоў да пасады міністра.

14 лістапада 2023 года Лукашэнка паведаміў, што ў малочнай галіне Беларусі была выкрытая сетка злачынных схем, у рамках якіх праводзіліся махінацыі з рэгуляваннем "індыкатыўных цэн" — мінімальных цэн, за якія беларуская мясная і малочная прадукцыя могуць быць рэалізаваныя за мяжу.

У той жа дзень намеснік начальніка следчай управы КДБ Канстанцін Бычак паведаміў, што фігурантамі "малочнай справы" сталі 26 чалавек, з якіх 15 змясцілі пад варту. Галоўным падазраваным у рамках справы стаў генеральны дырэктар «Бабушкінай крынкі» Генадзь Скітаў. Следства апублікавала фатаграфіі золата і валюты, якія захоўваліся ў яго дома.

Лукашэнка асабіста абвінаваціў Скітава ў стварэнні злачыннай сеткі.

Як сцвярджае КДБ, даходы ад махлярства з цэнамі пры рэалізацыі прадуктаў харчавання з Беларусі за мяжу складалі не менш як $10 млн за год. Дакладная роля Ігара Брыло ў «малочнай справе» на гэты момант не называецца.

Ці пагражае Брыло смяротнае пакаранне

Беларусь з'яўляецца адзінай краінай у Еўропе, у якой ужываецца смяротная кара. Згодна з заканадаўствам яна можа быць прызначаная мужчынам, якія ўчынілі злачынства пасля надыходу 18-гадовага веку і не дасягнулі на момант вынясення прысуду 65 гадоў, праводзіцца шляхам расстрэлу.

Найвышэйшая мера прадугледжаная паводле артыкулаў аб распачынанні або вядзенні агрэсіўнай вайны, міжнародным тэрарызме, дыверсіі, генацыдзе, злачынствах супраць чалавецтва, ужыванні зброі масавага знішчэння, забойстве дзвюх і больш асоб, захопе дзяржаўнай улады ды іншых.

Найвышэйшая мера не прадугледжаная за парушэнні закона ў эканамічнай сфэры. Калі супраць Брыло выстаўленыя абвінавачанні, звязаныя з махлярствам або растратай і якія не маюць дачынення да асабліва цяжкіх злачынстваў, яму не пагражае смяротнае пакаранне.