У Кыргызстане хочуць змяніць дзяржаўны сцяг

Ідэю падтрымаў прэзідэнт краіны.

Парламент Кыргызстана падтрымаў у першым чытанні законапраект аб змяненні дзяржаўнага сцяга.

Ухвалілі дакумент 66 дэпутатаў, восем выступілі супраць. Законапраекты ў Кіргізіі разглядаюцца ў трох чытаннях, у выключных выпадках у чатырох, піша РБК.

Цяперашні сцяг Кіргізіі ўяўляе з сябе чырвонае палатно з сонечным дыскам у цэнтры. 40 прамянёў азначаюць аб'яднанне старажытных плямёнаў. Унутры сонца намаляваны тундук – канструкцыя сферычнай формы, якая вянчае кіргізскай юрту. На дзейным сцягу промні сонца выгнутыя, а тундук складаецца з трох прутоў.

Праект аб змене сцяга ў канцы верасня падрыхтавалі спікер кіргізскага парламента Нурланбек Шакіеў і дэпутат Улан Прымаў. Аўтары дакумента адзначылі, што ў глядзельным успрыманні прамянёў сонца «ўзнікае дылема», выяву інтэрпрэтуюць як кветку сланечніка ці фальбону юрты. Таму дэпутаты прапанавалі змяніць прамяні з хвалепадобных на прамыя.

Акрамя таго, замест трох прутоў, з якіх складаецца тундук, прапануецца паказаць на сцягу чатыры. Шакіеў растлумачыў, што, паводле словаў гісторыкаў, «чатыры пруты тундука былі на юртах толькі багатых, заможных кыргызаў, тры – у беднякоў».

Прэзідэнт Кыргызстана Садыр Жапараў у кастрычніку падтрымаў змяненне сцяга. Ён адзначыў, што не раз жыхары і госці краіны параўноўвалі выяву на сцягу са сланечнікам. На думку Жапарава, калі дэпутаты ўхваляць змену сцяга, то «з гэтага часу мы не будзем залежнымі». «Мы павінны спадзявацца, што з гэтага часу будзем развітой і самастойнай краінай, падобна да прамянёў сонца на нашым сцягу, якія ўваходзяць праз тундук», – сказаў Жапараў.

Некаторыя парламентарыі і прадстаўнікі грамадскасці змену сцяга ўспрынялі негатыўна. Так, дэпутат Максат Сарбагышаў указаў, што «ва ўсе часы» прутоў на тундуку было толькі тры. Яшчэ адзін парламентарый Акбакон Ташанбекаў параўнаў новы сцяг з «зоркай злодзея ў законе».

Цяперашні сцяг Кіргізіі быў зацверджаны 2 сакавіка 1992 года Вярхоўным саветам Кіргізіі, а праз тры дні яго паднялі над будынкам ураду.