«Мы можам даць гэтаму месту зусім іншы ўзровень»

Беларусы адкрылі пад Варшавай незвычайны сушы-бар.

У польскім Прушкаве — месце за 18 кіламэтраў ад Варшавы — адкрыўся сушы-бар з незвычайнай назвай Sushi Kawa. У ім, вядома, гатуюць сушы, але кава ў меню таксама ёсць. Валодаюць установай беларусы. Пра тое, як нарадзілася ідэя ўстановы, чаму бізнэс наважылі пачаць у Прушкаве і колькі ў яго давялося ўкласці, беларусы расказалі MOST.

Сяргей і Алег знаёмыя 11 гадоў. Алег — з Віцебскай вобласці, там ён меў сваю дастаўку сушы па Полацку і Наваполацку. Кажа, у гэтым бізнэсе ён быў піянерам у Віцебскай вобласці. Сяргей досведу ў рэстаранным бізнэсе не меў, але пасля пераезду ў Польшчу ён зацікавіўся гэтай сфэрай і думаў адкрыць кавярню.

Два гады таму хлопцы сустрэліся ў Варшаве, абмяняліся ідэямі — і вось ужо месяц валодаюць сушы-барам.

Sushi Kawa — гэта гульня слоў. У японскай мове "гава" азначае "рака", тлумачаць хлопцы.

- Сушы рабіць мы ўмеем. Без залішняй сціпласці, мы можам даць гэтаму месту зусім іншы ўзровень. А спалучэнне сушы і кавы, напраўду, не такое ўжо рэдкае. У свеце поўна устаноў з такой канцэпцыяй, асабліва ў Амэрыцы, — кажа Алег.

У працоўным тандэме Сяргей бярэ на сябе арганізацыйныя абавязкі і працу з дакументамі, а Алег адказвае за кухню.

"Дзе ёсць McDonalds – там ёсць і кліенты"

Чаму для старту выбралі менавіта Прушкаў? Са слоў бізнэсоўцаў, з пошукам памяшканняў у Польшчы ёсць вялізныя цяжкасці.

- Здавалася б, вы з уладальнікам памяшкання ўмовіліся, ты кажаш, што заўтра вернешся з грашыма. А на наступны дзень гэтага памяшкання можа ўжо не быць.

Памяшканне, дзе цяпер знаходзіцца Sushi Kawa, выявілася даступным. А вызначальным чыннікам стала тое, што канкурэнцыя ў Прушкаве ніжэйшая, чым у сталіцы.

Аб патэнцыйным узроўні попыту хлопцы меркавалі з наяўнасці ў месце McDonalds.

- Маркетолагі McDonalds — разумныя і дасведчаныя людзі. Дзе ёсць McDonalds — там ёсць і кліенты, — запэўніў Алег.

Самым складаным у старце бізнэсу беларусы называюць атрыманне ўсіх дакументаў.

Адкрыццё ўстановы беларусам каштавала больш як 60 тысяч злотых. Памяшканне было ўжо з рамонтам, які рабіў папярэдні арандатар — за гэта давялося плаціць адступныя.

Але хлопцы прызнаюцца, што і гэтая лічба не канчатковая: шмат што ў інтэр'еры хочацца дарабіць — а гэта яшчэ «-ццаць» тысяч укладанняў.

Беларусы мяркуюць, што ў Польшчы, адкрываючы свой бізнэс, трэба на ўсялякі выпадак мець вялікую фінансавую падушку — 60% ад сумы ўкладанняў.

— Закрывацца часам даражэй, чым адкрывацца, — тлумачаць яны.

«Палякам трэба ўсё смажанае, з чаго б яно ні было зробленае»

Бізнэсоўцы адзначаюць: розніца паміж беларускімі і польскімі кліентамі каласальная. З назіранняў дзецюкоў, палякам не такая важная якасць і выгляд стравы, а яшчэ яны вельмі неахвотна каштуюць штосьці новае.

- Палякам усё гэта не трэба. Ім патрэбны толькі смажаны ласось і ў прынцыпе смажанае, з чаго б гэта ні было зробленае. І самае галоўнае — каб танна », —- засмучана кажа Алег.

Самы танны набор у бары складаецца з васьмі сушы і каштуе 20 злотых — менавіта ён карыстаецца ў палякаў найбольшай папулярнасцю. А вось беларусы і ўкраінцы купляюць значна больш ахвотна і зазвычай бяруць на суму большую за 100 злотых, каштуючы і навінкі, а не толькі «Філадэльфію».

У перспектыве беларусы плануюць перайсці выключна на аўтарскія начынкі, паасобныя з якіх ужо даступныя ў меню.

Установа працуе толькі месяц, але беларусы ўжо сутыкнуліся з несумленнай канкурэнцыяй.

- Унутры ўстановы збольшага працую я, таму кожнага кліента ведаю ў твар. Дык вось, пад нашай установай у Google з'явіліся водгукі з адной зоркай, без апісання і дададзеных фотаздымкаў. Проста адна зорка. Я з упэўненасцю магу сказаць, што гэтых людзей, мяркуючы з фотаздымкаў і імёнаў, у нас ніколі не было, - кажа Алег.