У Алматы 13 чалавек загінулі падчас пажару ў хостэле
- 30.11.2023, 11:05
- 3,884
![У Алматы 13 чалавек загінулі падчас пажару ў хостэле](https://i.c97.org/ai/573571/aux-head-1701331502-20231129_almaty_360.jpeg)
Большасць з іх атруціліся ўгарным газам.
У былой сталіцы Казахстана Алматы 13 чалавек загінулі падчас пажару ў памяшканні хостэла, абсталяваным у сутарэнні і на першым паверсе трохпавярховага жылога дома. Інцыдэнт адбыўся раніцай у чацвер, 30 лістапада, паведаміў гарадскі дэпартамент у надзвычайных сітуацыях.
Са звестак інтэрнэт-партала Orda.kz, сярод ахвяр - дзевяць грамадзян Казахстана, двое расейцаў і двое грамадзян Узбекістана. Усяго ў момант пажару ў хостэле знаходзіліся 72 чалавекі. Ратавальнікі мяркуюць, што загінулыя атруціліся ўгарным газам. У той жа час 59 чалавек самастойна пакінулі памяшканні хостэла.
Паведамленне аб пажары паступіла а 05.33 паводле мясцовага часу (02.33 паводле Менску), узгаранне плошчай блізу 30 кв. м. было ліквідавана на працягу гадзіны, у яго тушэнні прынялі ўдзел 46 чалавек і 13 адзінак тэхнікі. Прычыны ўзгарання высвятляюцца.