5 сакавiка 2024, aўторак, 3:57
Падтрымайце
сайт
Сім сім,
Хартыя 97!
Рубрыкі

У Рэчыцы школьнікі ў сталоўцы пабіліся праз кавалак хлеба

29
У Рэчыцы школьнікі ў сталоўцы пабіліся праз кавалак хлеба

Гісторыя атрымала нечаканае прадаўжэнне.

У Рэчыцы двое падлеткаў не падзялілі кавалак хлеба ў школьнай сталоўцы і зладзілі бойку. Адзін задзіра зламаў іншаму сківіцу – на яго завялі крымінальную справу. На днях суд вынес хлопчыку прысуд: выхаваўчыя захады ў выглядзе абмежавання вольнага часу, піша «Дняпровец».

Падрабязнасці інцыдэнту сталі вядомыя ў канцы жніўня – іх расказаў набліжаны да МУС тэлеграм-канал.

Справа была ў сталоўцы рэчыцкай школы. 14-гадовы падлетак папрасіў свайго аднагодку падзяліцца з ім кавалкам хлеба, але той толькі нагрубіяніў у адказ. Завязалася бойка, абдзелены хлебам хлопчык выліў кампот у твар аднакласніку, а той ударам кулака зламаў яму сківіцу.

Маці школьніка, які атрымаў траўму, звярнулася ў міліцыю. На яго нястрыманага спаборніка завялі крымінальную справу паводле арт. 149 КК (прычыненне менш цяжкіх цялесных пашкоджанняў).

Свае дзеянні юнак апраўдваў тым, што не меў намеру цярпець абразу ад аднакласніка (нагадаем, гаворка пра выліты кампот).

Зрэшты, абодва хлопчыкі заявілі, што не ўважаюць сябе за вінаватых – ні ў самім канфлікце з дробязнай прычыны, ні ў яго наступствах. Ніхто з іх не дапускаў і думкі ўладзіць спрэчку мірам.

Падлетку, які зламаў сківіцу таварышу, суд вынес прысуд – ужыць да школьніка захады выхаваўчага характару ў выглядзе абмежавання вольнага часу.

Аднак гэта не ўсё: ягоныя бацькі на патрабаванне маці пацярпелага хлопчыка выплацяць маральную кампенсацыю 3000 рублёў, а таксама пакрыюць ёй выдаткі на юрыдычную дапамогу памерам больш за 1000 рублёў.

Напісаць каментар 29

Таксама сачыце за акаўнтамі Charter97.org у сацыяльных сетках