У Беларусі ўзмацняецца праблема ў гандлі

Чыноўнікі мяркуюць, што ў гэтым вінаватае насельніцтва.

У Беларусі павялічваецца дысбаланс у знешнім гандлі. У кастрычніку імпарт тавараў у нашу краіну яшчэ больш прыкметна стаў перавышаць экспарт. Пра гэта паведамляе Белстат. Раней чыноўнікі сярод прычынаў такога перакосу ў гандлі называлі попыт з боку насельніцтва на імпарт.

У студзені – кастрычніку знешнегандлёвы зварот тавараў у нашай краіне быў на ўзроўні 68 млрд 556,3 млн даляраў. Так, экспарт склаў за гэты перыяд 33 млрд 145,6 млн даляраў, а імпарт быў на 2 млрд 265,1 млн даляраў большы. За мінулы месяц гэтая разбежка павялічылася на 218,9 млн даляраў.

Прычым у гандлі з краінамі СНД наша краіна ў студзені – кастрычніку была ў плюсе – экспарт перавышае імпарт на 3 млрд 5,2 млн даляраў. Што да статыстыкі гандлю з дзяржавамі па-за СНД, то тут за 10 месяцаў гэтага года тавараў увезлі ў нашу краіну на 5 млрд 270,3 млн даляраў больш, чым мы паставілі на экспарт.

Чыноўнікі не першы год змагаюцца з імпартам, але адчуваюць з гэтым цяжкасці. Тым часам Беларусь усё больш збліжаецца з Расеяй у знешнім гандлі.

У канцы верасня сёлета намеснік міністра эканомікі Андрэй Картун заявіў, што «рынак ужо дастаткова насыціўся імпартам, тэмпы росту імпарту будуць скарачацца, будзе выраўноўвацца сальда знешняга гандлю». Чыноўнік таксама гаварыў, што ўрад пакуль не бачыць рызык праз гэты перакос у знешнім гандлі. Ён таксама звяртаў увагу на адну з прычынаў паскоранага павелічэння імпарту – рост спажывецкага рынку. «Тут у нас і ўнутраны рынак засумаваў па пэўных таварах», – адзначыў раней Андрэй Картун.