«Фёдар спіць ля тэлевізара і любіць аўсянае печыва»

Гісторыя пра дзіўнае сяброўства Алега і ягонага аленя.

Пяць гадоў таму на падворку Алега Пратаса ў Налібоцкай пушчы са статкам авечак зайшло траўмаванае аленяня. Пашкадаваўшы яго, фермер надумаў пакінуць малога. Назваў Фёдарам. Так аленяня і прыжылося на хутары: пасябравала з канямі, ганяе аўчарак і часам забаўляе леснікоў з грыбнікамі, «танцуючы» на задніх нагах, піша БелТА.

Адное з такіх відэа пару месяцаў таму за дзень набрала ў TikTok амаль два мільёны праглядаў, зрабіўшы Федзю самым знакамітым насельнікам тутэйшых лясоў. Алень вольна шпацыруе па пушчы, часам знікаючы на цэлы дзень. Але, ледзь пачуўшы матор гаспадарскай машыны, адразу бяжыць на падворак сустракаць найлепшага сябра.

Хутар дастаўся Алегу Пратасу ў спадчыну. Ён з дзяцінства любіў прыязджаць у пушчу да бабулі з дзядулем. Дапамагаў у гаспадарцы, касіў траву. У дзеда заўсёды былі коні, каровы.

«Таму, калі вярнуўся сюды, таксама надумаў іх разводзіць. Сам хоць і жыву з сям'ёй у Івянцы, у пушчу прыязджаю практычна кожны дзень. Пастаянна нешта будуем, дарабляем, рэканструюем. Планую адрамантаваць дом і пабудаваць на ўчастку яшчэ адзін, гасцявы дом», - распавядае Алег. Нейкі час ён працаваў у сталіцы - займаўся рамонтам тэхнікі, потым быў начальнікам аховы. Амаль сем гадоў вёў дыскатэкі ў мясцовым Доме культуры. І ўвесь гэты час марыў вярнуцца ў пушчу.

«Калі мне 8 гадоў таму дастаўся ў спадчыну хутар, вырашыў займацца фермерствам. Узяў у арэнду зямлю, адкрыў фермерскую гаспадарку. Цяпер яна вялізная: куры, качкі, авечкі, гусі, каровы, свінні, два кані. Найбліжэйшым часам планую прыкупіць яшчэ некалькі коней», - дзеліцца планамі мужчына.

Самым каларытным насельнікам двара з'яўляецца, вядома ж, алень Федзя. Характар у яго няпросты. З Алегам паводзіць сябе далікатна, а вось калі на хутар прыязджаюць іншыя людзі, можа лёгенька ўскубнуць або паштурхацца, паказваючы, хто тут гаспадар. Часам любіць схадзіць у лес паганяць грыбнікоў і ягаднікаў. Пачуў у лесе галасы ці шум тэхнікі - адразу бяжыць «дапамагаць». Фёдар заўсёды прыходзіць на дапамогу і свайму сябру, але часам хутчэй Алегу на шкоду. Так здарылася, калі алень надумаў дапамагчы сям'і Пратас на градках.

«Паспрабавалі пасадзіць на хутары бульбу. Яна пайшла ў рост, я яе нават апрацаваў. Але як толькі Федзя зразумеў, што ў зямлі нешта ёсць, дубасіў па ёй да таго часу, пакуль не выкапаў усё да апошняй бульбіны. А скончыўшы "працу" ў нас, адправіўся да суседзяў. Тым прыйшлося спускаць сабак, каб адвадзіць няпрошанага госця. Бег дадому хутка як ніколі, а калі вярнуўся, яшчэ доўга глядзеў у бок суседзяў, маўляў, там яго крыўдзілі», - усміхаецца Алег. Дарэчы, пацешныя выпадкі з Федзям адбываюцца ўвесь час. Напрыклад, калі гаспадар хутара з'ехаў у Івянец, алень адчыніў пысай уваходныя дзверы дому і ўлёгся на начлег на дыване ля тэлевізара. Там галава сям'і Пратас яго і знайшоў, калі раніцай зайшоў у дом.