ISW: Расея назвала свае мэты ва Украіне

Перамовы не маюць сэнсу.

Аналітыкі ISW звярнулі ўвагу на заяву прэс-сакратаркі расейскага МЗС Марыі Захаравай, якая пацвярджае нязменнасць максімалісцкіх мэт Расеі ва Украіне і фактычнага патрабавання Крамля аб поўнай палітычнай капітуляцыі Украіны.

У пісьмовым інтэрв'ю AFP 9 снежня Захарава акрэсліла расейскае бачанне нібыта "ўсёабдымнага, устойлівага і справядлівага ўрэгулявання канфлікту". Паводле ейных слоў, для гэтага Захад павінен спыніць "напампоўванне Узброеных сілы Украіны зброяй", а Украіна - фактычна здаць уласныя тэрыторыі і "вывесці войскі" з украінскіх зямель, аб анэксіі якіх РФ раней заявіла. Захарава таксама пацвердзіла актуальнасць даўніх заяў Крамля аб тым, што Расея ўварвалася ва Украіну для "дэмілітарызацыі", "дэнацыфікацыі" і "забеспячэння правоў рускамоўных грамадзян" ва Украіне. У ISW нагадваюць, што Крэмль увесь час выкарыстоўвае слова "дэнацыфікацыя" як кодавы тэрмін для ідэі ліквідацыі законна абранай улады Украіны і яе замены такой уладай, якая была б прымальнай для Крамля. А “дэмілітарызацыя” відавочна назаўжды мусіць пакінуць Украіну залежнай ад волі Расеі. «”Каментары Захаравай выразна падкрэсліваюць той факт, што першапачатковыя мэты поўнамаштабнага ўварвання Расеі ва Украіну, выкладзеныя Уладзімірам Пуціным 24 лютага 2022 г., не змяніліся, і што Пуцін не мае намеру спыняць вайну, пакуль яго максімалісцкія мэты не будуць дасягнутыя, - адзначаюць аналітыкі. . - ISW працягвае ацэньваць, што Расея не мае намеру весці сур'ёзныя і добрасумленныя перамовы з Украінай і што перамовы на ўмовах Расеі раўнасільныя поўнай капітуляцыі Украіны і Захаду”.

Агучанае Захаравай патрабаванне Масквы аб тым, каб Украіна вывела свае войскі з уласных тэрыторый, дадаткова сведчыць, што максімалісцкія мэты Расеі ўключаюць кантроль над усімі чатырма абласцямі, якія яна незаконна анэксавала. Цяпер расейскія войскі кантралююць толькі часткі Данецкай, Луганскай, Запарожскай і Херсонскай абласцей, але ў верасні 2022 года Расея заявіла, што нібыта “ўключыла” іх у свой склад пасля фарсавых “рэферэндумаў”. Такім чынам, зараз расейскія патрабаванні ўключаюць здачу дадатковай тэрыторыі Украіны, якую акупанты пакуль не кантралююць - аж да адміністрацыйных межаў чатырох часткова акупаваных абласцей Украіны. Таму, як падкрэсліваюць у ISW, заклікі да капітуляцыі Украіны ў цяперашніх абставінах, калі РФ акупавала і кантралюе ўкраінскія тэрыторыі аж да лініі фронту, непрымальныя з пункту гледжання жыццёва важных інтарэсаў нацыянальнай бяспекі Украіны і Захаду. А патрабаванне РФ аб здачы акупантам яшчэ большай колькасці земляў паказвае на тое, што мэты Расеі выходзяць далёка за межы захавання тэрыторыі, якую ўжо захапілі расейскія войскі. Акрамя таго, нагадваюць аналітыкі ISW, цяпер войскі РФ працягваюць праводзіць актыўныя наступальныя аперацыі ва ўсходняй частцы Харкаўскай вобласці, аб анэксіі якой Расея не заяўляла - гэта пацвярджае, што тэрытарыяльныя мэты РФ могуць быць нават больш экспансіўнымі, чым выкладзеныя Захаравай. У той жа час аналітыкі ISW нагадваюць, што гіпатэтычны захоп астатніх неакупаваных раёнаў Данецкай, Луганскай, Запарожскай і Херсонскай Украіны абышоўся б Расеі велізарным коштам - і крыві, і выдаткаў, і часу - калі РФ наогул здольная гэта зрабіць.