Польшча разблакавала самы вялікі грузавы пункт пропуску на мяжы з Украінай

Пункт Ягадзін – Дарахуск запрацаваў пасля больш чым месяца блакавання.

Польшча разблакавала самы вялікі грузавы пункт пропуску з Украінай – «Ягадзін – Дарахуск». Пра гэта паведаміў міністр інфраструктуры Украіны Аляксандр Кубракоў.

«Блакада пункта пропуску “Ягадзін – Дарахуск” закончаная. З 14:00 там адноўлены стабільны рух грузавікоў. У кірунку Украіны праехалі 15 транспартных сродкаў – яны на пункце пропуску. Таксама 25 грузавікоў афармляюцца – будуць накіроўвацца ў бок Польшчы», – гаворыцца ў Facebook міністра.

Паводле інфармацыі Дзяржаўнай мытнай службы, уезду ва Украіну праз Ягадзін чакаюць блізу 1000 грузавікоў, столькі ж – выезду (палова – у электроннай чарзе).

Пра заканчэнне блакады таксама паведаміла Дзяржаўная памежная служба.

«Сёння ў 14.00 закончылася акцыя пратэсту польскіх перавознікаў перад пунктам пропуску “Дарахуск – Ягадзін”. Афармленне і пропуск праз мяжу грузавых транспартных сродкаў у абодвух кірунках ажыццяўляецца ў звычайным рэжыме», – гаворыцца ў паведамленні памежнікаў.

Паводле словаў Кубракова, заканчэнню блакады папярэднічалі дзясяткі сустрэчаў, перамоваў на ўсіх магчымых узроўнях.

«Гэта была складаная праца, але яна яшчэ не закончаная. Мяжа павінна быць разблакаваная цалкам, а далейшае блакаванне не дапушчальнае», – указаў міністр.