Маляваныч напісаў сваю першую кнігу
3- 19.12.2023, 12:55
- 2,166
Гэта будзе казка для дзяцей.
Беларускі актор Аляксандр Ждановіч, вядомы як Маляваныч з праграмы "Калыханка", выдаў першую кнігу - дзіцячую казку "Кропля ў космасе". Яна выйдзе ў лютым, але ўжо даступная для папярэдняй замовы.
Пра папярэднюю замову на сваю кнігу Аляксандр Ждановіч напісаў у сябе ў “Фэйсбуку”.
“Гонар мяне так і распірае”, - прызнаўся ён.
“Пра што мараць хлопчыкі і дзяўчаткі? Пра порцыю смачнага марозіва? А можа, пра новы смартфон ці кампутарную гульню? А ці ведаеце вы, пра што марыла адна гарэзлівая дажджавая Кропля, калі ляцела са страшэннай вышыні на зямлю? Даведаецеся пра гэта прачытаўшы казку „Кропля ў космасе“. Напісаў яе адзін чароўны дзядзька, які так даўно жыве на свеце, што, калі вашыя мамы і таты былі такія, як вы цяпер, ён ужо расказваў ім казкі перад сном! Бо жыццё — гэта цуд! Як добрая казка!” - так актор прэзентаваў сваю кнігу.
Казка будзе надрукаваная ў польскім выдавецтве Słowianka ў лютым і тады ж паступіць у продаж. Але папярэднюю замову можна зрабіць ужо зараз — з дастаўкай не толькі па Польшчы, але і па ўсім свеце.