Грэцыя гатовая прапанаваць Вялікай Брытаніі «вялікія скарбы» за мармур Парфенона

Падрабязнасці.

Грэцкі ўрад гатовы расстацца з некаторымі сваімі найвялікшымі скарбамі, каб «запоўніць пустэчу» ў Брытанскім музеі, калі мармур Парфенона вернуць у Афіны, піша The Guardian.

Міністр культуры Грэцыі Ліна Мендоні адзначыла, што ў выпадку вяртання ў Афіны шэдэўраў V стагоддзя да нашай эры грэцкія галерэі Брытанскага музея «ніколі не будуць пустымі». «Наша пазіцыя дакладная. Калі скульптуры будуць вернутыя ў Афіны, Грэцыя гатовая арганізаваць выставы каштоўных артэфактаў, якія запоўняць гэтую пустату», - дадала Мендоні.

Мендоні расказала, што ў перамовах з Лонданам яшчэ не абмяркоўваліся канкрэтныя артэфакты. Яна запэўніла, што старажытнасці, якія Грэцыя прапануе замест мармуровых скульптур, адновяць цікавасць замежных наведвальнікаў да грэцкіх галерэй Брытанскага музея.

Аднак міністр падкрэсліла, што ўсякае пагадненне і ўсе яго дэталі павінны карэлявацца з грэцкім законам аб культурнай спадчыне.

З моманту зараджэння ідэі культурнага абмену з'явіліся здагадкі, што ў Брытанію адправяць Маску Агамемнана - залатую пахавальную маску, датаваную сярэдзінай II тысячагоддзя да нашай эры. Некаторыя гісторыкі называюць яе «Монай Лізай дагістарычных часоў».

Калекцыя Брытанскага музея ўключае амаль палову 160-метровага фрыза Парфенона, які адлюстроўвае працэсію да храма Панафінейскага фестывалю ў гонар багіні Афіны. Акрамя таго, там ёсць 15 скульптурных панэляў і 17 франтонных фігур, якія былі часткай унікальнага аздаблення сабора.

Канфлікт паміж Афінамі і Лонданам вакол мармуровых скульптур Парфенона ўважаюць за самую працяглую культурную спрэчку Еўропы. У перыяд 1801—1811 гадоў брытанскі пасол у Асманскай імперыі Томас Брус (лорд Элгін) вывез з Грэцыі ў Лондан частку мармуру Парфенона — галоўнага храма Афінскага акропаля.

У 1983 годзе грэцкі ўрад афіцыйна звярнуўся да ўрада Вялікай Брытаніі з просьбай вярнуць мармур у Грэцыю, а пасля ўнёс спрэчку ў спіс ЮНЭСКА.