Усю Беларусь заваліла снегам
6- 3.12.2023, 21:01
- 19,880
![Усю Беларусь заваліла снегам](https://i.c97.org/ai/574027/aux-head-1701626302-20231122_sneg_360.jpg)
Таўшчыня покрыва месцамі больш за 40 см.
Аранжавы ўзровень небяспекі на 3 снежня сіноптыкі аб'яўлялі нездарма. Снегапад пачаўся яшчэ ўвечары ў суботу і працягваўся як мінімум да абеду нядзелі, а ў некаторых раёнах Беларусі, асабліва па паўночным усходзе, – і да вечара, піша «Зеркало».
Ужо раніцай уся краіна была засыпана снегам. Як заўважыў тэлеграм-канал «Надворʼе», трохсантыметровае покрыва мелася нават у Горадні, тады як на «полюсе холаду» Беларусі, у Езярышчы, снегу нападала і зусім 41 см.
![](https://i.c97.org/ai/574027/aux-1701626307-1.jpg)
Да вечара нядзелі, як бачна на мапах сэрвісу Windy, большая частка Беларусі пакрытая снегам таўшчынёй 20-30 см. У раёне Менска, напрыклад, ляжыць амаль 22 см снегу. На паўночным усходзе – 30-40 см і будзе больш: снег працягвае падаць. Толькі раён Горадні і Ліды выдзяляецца невялікім снежным покрывам таўшчынёй усяго некалькі сантыметраў.
Вось як увечары нядзелі выглядаюць вуліцы Віцебска.
Снегапад, як заўсёды, стаў праблемай для камунальных і дарожных службаў. Раніцай нядзелі вуліцы і ходнікі гарадоў і ўсе трасы былі ў снезе: мяркуючы па шматлікіх фота і відэа ў сацсетках, нават у цэнтры Менска і на асноўных магістралях за ўборку ўзяліся толькі ў нядзелю, уначы тэхніка на ачыстку не выязджала, хаця снег ішоў з вечара. На відэа, напрыклад, стан даволі ажыўленых вуліц у Бабруйску.
У Менску дарогі чысцяцца лепей, але чыстымі іх днём усё роўна назваць было складана, мяркуючы па відэа ад гарвыканкама і ДАІ.
Кіраўніцтва гарадской ЖКГ паабяцала, што прыбіраць двары ад снегу з выкарыстаннем спецыяльнай тэхнікі прадоўжаць аж да 20-21 гадзін. На 16.00 у сталіцы на ўборцы толькі прыдамавых тэрыторый было задзейнічана 1913 чалавек і 156 адзінак тэхнікі, у тым ліку 22 адзінкі малагабарытнай тэхнікі. Да ачысткі двароў далучыліся таварыствы ўласнікаў.
![](https://i.c97.org/ai/574027/aux-1701626307-2.jpg)
Камунальнікі заклікалі кіроўцаў не забываць аб абавязку расчышчаць снег вакол свайго аўто на адлегласць не меншую за метр.
![](https://i.c97.org/ai/574027/aux-1701626307-3.jpg)
Таксама ў ЖКГ Менска нагадалі, што ў такія моцныя снегапады для жыхароў горада адкрываюцца пункты выдачы рыдлёвак. Яны працуюць ад 6.30 да 21.00.
У сувязі са складаным становішчам на дарогах ДАІ, між іншым ў Менскай вобласці, абʼявіла план «Надворʼе». На трасах працуе шмат снегаўборачнай тэхнікі – кіроўцаў вельмі просяць яе не апярэджваць і тым больш не абганяць, гэта можа прывесці да аварый. Таксама аўтамабілістаў заклікаюць без патрэбы не выязджаць на асабістым транспарце, быць максімальна асцярожнымі, не спяшацца, не рабіць рэзкіх манеўраў і тармажэнняў, акуратна праязджаць масты, падʼёмы, спускі, закругленні дарог.
Калі па дарозе нешта здарылася і вы не можаце працягнуць рух, трэба патэлефанаваць на «102» – ДАІ абяцае дапамагчы.
Чаго чакаць у панядзелак?
На дарогах прагназуецца галалёд – сіноптыкі абʼявілі жоўты ўзровень небяспекі. Надворʼе будзе воблачным з праясненнямі, чакаецца кароткачасовы снег. Прыкладна такі прагноз і на аўторак-сераду. А ўвогуле на наступным тыдні ў Беларусь павінна прыйсці моцнае пахаладанне.