ЗША вылучылі абвінавачанні групе вайскоўцаў РФ за ваенныя злачынствы ва Украіне

Упершыню ў гісторыі.

Злучаныя Штаты Амерыкі сёння, 6 снежня, паведамілі пра вылучэнне абвінавачанняў чатыром расейскім вайскоўцам за ваенныя злачынствы, якія яны здзейснілі падчас уварвання ва Украіну.

Пра гэта паведамляе Міністэрства юстыцыі ЗША.

Гаворка ідзе пра Сурэна Сейрановіча Мкртчана, Дзмітрыя Будніка і двух расейцаў, чые прозвішчы ЗША невядомыя. Толькі вядома, што іх клічуць Валерый і Назар.

Іх абвінавачваюць у незаконным затрыманні грамадзяніна ЗША падчас уварвання Расеі ва Украіну. Яго дапытвалі, жорстка збівалі і катавалі. Яны таксама пагражалі забіць ахвяру і інсцэніравалі пакаранне.

«Міністэрства юстыцыі вылучыла першыя ў гісторыі абвінавачванні паводле статута ЗША аб ваенных злачынствах чатыром звязаным з Расеяй вайскоўцам за цяжкія злачынствы супраць амерыканскага грамадзяніна. Міністэрства юстыцыі будзе працаваць столькі, колькі спатрэбіцца, каб дамагчыся адказнасці і справядлівасці за агрэсіўную вайну Расеі», – сказаў генеральны пракурор ЗША Мерык Гарланд.