Ерэван і Баку дамовіліся пра абмен палоннымі і «ўзаемны давер»

Дзве дзяржавы пацвярджаюць свой намер урэгуляваць стасункі і заключыць мірную дамову.

Азербайджан і Арменія апублікавалі супольную заяву пра захады ўрэгулявання канфлікту, у ёй гаворыцца, што бакі ўзаемна вызваляюць частку палонных і зняволеных і маюць намер «зрабіць адчувальныя крокі для ўмацавання ўзаемнага даверу».

Азербайджан у якасці жэсту добрай волі вызваляе 32 армянскіх вайскоўцаў. Арменія, у сваю чаргу, вызваляе двух азербайджанскіх вайскоўцаў.

У заяве Баку і Ерэвана гаворыцца, што Арменія і Азербайджан згодныя з тым, што існуе гістарычная магчымасць дасягнуць доўгачаканага міру ў рэгіёне. Дзве дзяржавы пацвярджаюць свой намер урэгуляваць стасункі і заключыць мірную дамову, заснаваную на павазе прынцыпаў суверэнітэту і тэрытарыяльнай цэласнасці.