13 красавiка 2024, Субота, 19:34
Падтрымайце
сайт
Сім сім,
Хартыя 97!
Рубрыкі

Як бяспечна вывезці вялікія сумы грошай з Беларусі?

14
Як бяспечна вывезці вялікія сумы грошай з Беларусі?

Ёсць чатыры шляхі.

Уявім сабе сям'ю беларусаў, якая сабралася перабрацца за мяжу і прадала кватэру. Як пераправіць грошы? Ёсць чатыры шляхі - і кожны мае свае рызыкі, піша «Белсат».

Шлях №1. Перавезці праз мяжу, задэклараваўшы

Тэарэтычна, беларусы маюць права перавозіць праз мяжу якія заўгодна сумы грошай. Ёсць толькі адно абмежаванне: пры сумах звыш $10 000 у эквіваленце ( курсам на дзень пераходу мяжы) грошы трэба дэклараваць. На гэтым этапе могуць узнікнуць праблемы.

Дэклараваць грошы, значыць, паведамляць пра іх дзяржаве, якой цяпер «не да законаў».

Былы палітвязень, блізкі палітвязня ці кожны, на каго сістэма ўжо звяртала ўвагу, знаходзіцца ў зоне рызыкі.

Сілавікі могуць «не паверыць», што чалавек атрымаў грошы ад продажу кватэры, і сказаць, што ён іх «атрымаў за экстрэмісцкую дзейнасць».

Калі ж незадэклараваныя грошы знойдуць, то канфіскуюць усё звыш $10 000 і накладуць штраф.

Канфіскаваць грошы могуць нават у тым выпадку, калі зрабіць на мяжы некалькі няправільных крокаў у пошуку кансультацый.

Шлях №2. Перавесці праз банк або аплатныя сістэмы

Большасць банкаў Беларусі ўсё яшчэ працуе з найбольш папулярнымі карткамі Visa і MasterCard, усё яшчэ пераводзіць грошы на замежныя рахункі, у тым ліку праз сістэму SWIFT. Праблема не толькі ў тым, што за гэта возьмуць камісію 1-2% ці нават больш (асабліва калі суму ў беларускіх рублях трэба канвертаваць у замежную валюту).

Пераводы ва ўмовах санкцыяў яшчэ і небяспечныя, бо могуць не прайсці. Замежны банк можа раптам наважыць, што працаваць з беларускім банкам небяспечна з нейкай прычыны. Або нават калі беларускі банк не пад санкцыямі, банк-карэспандэнт можа выявіцца падсанкцыйным. Грошы могуць вярнуць за вылікам камісіі, а могуць і проста замарозіць.

Акрамя таго, калі ў Беларусі пакласці на рахунак вялікую суму, ва ўладаў можа ўзнікнуць пытанне аб паходжанні грошай.

Шлях №3. Знайсці брокера

Гэтая сістэма не новая. Яна ўзнікла ў Іране, калі краіну ў пачатку 1980-х адключылі ад SWIFT. Яна сама наладжваецца: калі ў цябе няма фізічнай магчымасці вывезці вялікую колькасць грошай, сістэма брокераў узнікае спантанна.

Але з брокерамі праблема ў тым, што ім трэба давяраць: калі аддаваць грошы ў Беларусі, трэба мець упэўненасць, што за мяжой грошы вернуць. Да таго ж, брокеры могуць браць вялікія адсоткі за свае паслугі, бо такая неліцэнзаваная дзейнасць рызыкоўная.

Шлях №4. Перавесці ў крыптавалюту і назад

Грошы можна пераводзіць у абыход банкаў і ўсякіх межаў, калі канвертаваць іх у крыптавалюту, і ў Беларусі за такія пераводы не трэба плаціць падаткі за дзеянні з крыптавалютай, прынамсі, да 2025 года. Незаконна хіба што расплачвацца крыптавалютамі за тавары і паслугі.

Але з гэтым ёсць дзве праблемы. Першая - курсы крыптавалют абсалютна непрадказальныя, могуць залежаць ад шматлікіх фактараў, у тым ліку ад твітаў Ілана Маска, падскочыць у невыгодны бок за вельмі кароткі час.

Другая - грошы трэба неяк канвертаваць затым у крыптавалюту назад. За гэта могуць узяць адчувальныя камісіі.

Напісаць каментар 14

Таксама сачыце за акаўнтамі Charter97.org у сацыяльных сетках