Расейская авіяцыя распадаецца проста ў паветры

Дзясяты самалёт расейскай авіякампаніі паламаўся ў палёце з пачатку снежня.

Расейская мірная авіяцыя пачала масава сыпацца на зыходзе другога года санкцый. За першыя восем дзён снежня дзесяць бартоў сутыкнуліся з няспраўнасцямі падчас палёту, піша The Moscow Times.

Апошні выпадак адбыўся 8 снежня з самалётам Boeing-737 авіякампаніі S7, які выконваў рэйс Новасібірск - Масква. Яму давялося здзейсніць экстранную пасадку ў аэрапорце вылету пасля таго, як пры наборы вышыні з абодвух рухавікоў паляцелі іскры, піша тэлеграм-канал Shot. Ніхто з пасажыраў не пацярпеў.

Чыннікам інцыдэнту мог стаць пампаж - парушэнне ў працы рухавіка самалёта, пры якім паветра ў кампрэсары зрываецца з наўпроставага руху і пачынае ствараць завіхрэнні паміж лопасцямі сілавога агрэгата.

Тое ж самае адбылося напярэдадні, 7 снежня, з грузавым самалётам «Ту-204м», які рухаўся з Улан-Удэ ў Чжанчжоу. У яго таксама паляцелі іскры з рухавікоў праз некалькі хвілін пасля ўзлёту. Пілоты скінулі паліва і здзейснілі паспяховую пасадку ў аэрапорце Байкал. Ніхто не пацярпеў.

За дзень да гэтага, 6 снежня, узгаранне адбылося на борце Boeing-777 «Аэрафлоту», які павінен быў здзейсніць рэйс Масква - Камчатка. Адзін з пасажыраў заўважыў задымленне ля пасажырскага крэсла. У самой авіякампаніі зняпраўдзілі задымленне, але прызналі, што замянілі борт праз пах плаўленай пластмасы.

У аўторак, 5 снежня, у самалёта Ан-12 адмовіў у палёце трымер стырна кіравання. Пілоты зрабілі экстранную пасадку ў аэрапорце Хурба ў Камсамольску-на-Амуры. Ніхто з васьмі чалавек, якія знаходзіліся на борце, не пацярпеў.

Таксама 5 снежня аварыйную пасадку ў маскоўскім аэрапорце Шарамеццева здзейсніў самалёт з Казані. У яго адмовіла кіраванне сістэмай стабілізацыі. На борце знаходзіліся 188 чалавек.

2 снежня Airbus А321 «Аэрафлота», які ляцеў з Санкт-Пецярбурга ў Маскву, запытаў аварыйную пасадку ў аэрапорце Шарамеццева. Пастанова аб экстранным прызямленні была прынятая праз адмову левага рухавіка. Ніхто са 162 пасажыраў не пацярпеў.

У гэты ж дзень у цюменскім аэрапорце «Рошчына» праз тэхнічныя прычыны здзейсніў пасадку на запасны аэрадром самалёт Superjet 100 авіякампаніі «Ямал», які рухаўся з Наябрска ва Уфу. На борце знаходзіўся 71 чалавек без экіпажа.

1 снежня выйшлі са строю адразу тры самалёты. Airbus A321 «Аэрафлота», які ляцеў з Калінінграда ў Маскву, быў вымушаны прызямліцца ў пецярбуржскім аэрапорце Пулкава праз спрацоўванне індыкацыі сістэмы кандыцыянавання кабіны пілотаў.

Раніцай таго ж дня ў МНС паведамілі, што іншы самалёт «Аэрафлоту» - Boeing 737 з 408 пасажырамі на борце, які выконваў рэйс з Масквы, - здзейсніў аварыйную пасадку ў Паўднёва-Сахалінску. Пастанова была прынятая праз спрацоўванне індыкацыі аб падзенні ціску на адным з шасці колаў стойкі шасі.

Нарэшце, у Новасібірску ў самалёта «ІрАэра» з 78 пасажырамі на борце адмовілі аўтапілот і закрылкі пасля вылету з аэрапорта Талмачова. Паводле інфармацыі Shot, борт Superjet 100, які павінен быў накіравацца ў Талакан, зрабіў больш за дзевяць колаў у зоне чакання перад тым як шчасна прызямліцца. Ніхто не пацярпеў.

З вясны 2022 года, калі супраць расейскай авіяцыі былі ўведзеныя санкцыі ЗША і ЕЗ, авіякампаніі патрабуюць ад персаналу не ўносіць дэфекты тэхнікі ў бартавыя часопісы (TLB), у выніку чаго самалёты часта лятаюць няспраўнымі, пісаў «Проект». Са слоў былога пілота авіякампаніі Nordwind, многія вознікі сталі лётаць, спадзеючыся на «расейскае авось».