СМІ: Дэсант УСУ высадзіўся на Кінбурнскай касе

Аналітыкі ISW раскрылі падрабязнасці аперацыі.

Украінскія абаронцы працягваюць замацоўвацца на левым беразе Херсоншчыны на тэрыторыі населеных пунктаў, прылеглых да Дняпра.

У Генштабе Украіны пацвердзілі прысутнасць УСУ на левабярэжжы Херсоншчыны.

А Z-паблікі пішуць, што напярэдадні ўкраінскія абаронцы не дабіліся істотнага поспеху на гэтым адцінку фронту.

Аналітыкі з Інстытута вывучэння вайны (ISW) пастанавілі прааналізаваць сітуацыю, адштурхваючыся ад звестак украінскіх і расейскіх крыніц.

УСУ працягваюць утрымліваць свае пазіцыі як у саміх Крынках, так і ў лясным масіве, які знаходзіцца ля вёскі. Расейская авіяцыя і артылерыя спрабуе выбіць УСУ з гэтага населенага пункта, наносячы штодзённыя масаваныя абстрэлы.

Z-канал «Рыбар» сцвярджае, што на гэтым тыдні невялікая дэсантная група УСУ высадзілася на Кінбурнскай касе. Пры гэтым ён не ўдакладніў, дзе менавіта. Хутчэй за ўсё, украінскія абаронцы правялі выведку боем.

Учора спікер ВМС УСУ Дзмітрый Плецянчук заявіў, што вораг знізіў актыўнасць сваёй авіяцыі пасля надзвычайнага здарэння ад 5 снежня, калі ўкраінскія зенітчыкі знішчылі варожы Су-24М на востраве Змяіным.