Што пачым на снежаньскай Камароўцы?

На галоўным рынку Менска можна знайсці нават лісічкі.

Кавуны ў несезон, свежыя лісічкі, агуркі, а таксама мандарыны і таматы на любы кашалёк. Што і пачым прадаюць на Камароўцы ў гэтыя выходныя, расказваюць «Менск-Навіны».

Кошты на авакада ў асноўным ад 6 да 8 рублёў. Але можна знайсці стэнды з бразільскімі пладамі па 3 рублі за штуку, як і гатунак з Ізраілю, які аддаюць па 2 рублі. Прадаўцы запэўніваюць, што па гусце і якасці да танных авакада прэтэнзій не будзе. Але пры ўмове, калі іх не скамячыць у пакеце па дарозе дадому і з'есці ў той жа дзень.

Шампіньёны прадаюць па 8-9,5 рубля, у залежнасці ад гатунку. А вось лісічкі ўжо будуць даражэйшымі – за кілаграм трэба аддаць амаль 17 рублёў. Грыбы свежыя, але не з заснежанага лесу, вядома ж, а культываваць.

На агуркі кошт розны. «Гладкія» ляжаць па 7-8 рублёў за кілаграм. А вось тыя, што калючыя і крыху больш хрумсткія, ужо ад 12 рублёў. Затое яны, як піша карэспандэнтка «Менск-Навін», хаця б пахнуць. Таму дарагія агуркі бяруць часцей, нават нягледзячы на кошт.

З памідорамі такая ж гісторыя: тыя, што прыехалі з Азербайджана і каштуюць 16 рублёў, падобныя на «летні» варыянт. Таматы танней больш «пластыкавыя». У цэлым розніца ў кошце на розныя віды гэтай гародніны – ад 10 і аж да 40 рублёў.

Радыска абыдзецца ў 4 рублі за пучок (ёсць толькі імпартны), перцы – ад 4 да 16 рублёў за кіло, баклажаны каштуюць прыкладна гэтак жа – ад 7 да 16. Розная салатная зеляніна – ад 1,5 да 15 рублёў за пучок.

Беларускую бульбу прадаюць ад рубля да трох за кілаграм, а вось за імпартныя клубні просяць ужо 12 рублёў.

Сярод садавіны традыцыйна папулярныя і ў прадаўцоў, і ў пакупнікоў мандарыны. Яны сустракаюцца ад 5 да 25 рублёў, па рэгіёнах паходжання разбежка таксама вялікая – ад Абхазіі да Гішпаніі. У сярэднім фрукт, які асацыюецца з Новым годам, прадаюць па 8-9 рублёў.

Апельсіны каштуюць ад 6,5 да 25 рублёў за кілаграм, грэйпфруты – ад 6 да 15 рублёў. Затое дзіўна вялікі роскід коштаў на бананы. На прылаўках яны знайшліся і па 2,9 рублі за кілаграм да 15.

Дзіўна, але нягледзячы на канец сезона, яшчэ прадаюць кавуны. Кошт – ад 3 да 25 рублёў за кілаграм.

Дарагім задавальненнем застаюцца ягады. Буякі каштуе ад 22 да 120 рублёў за кілаграм, маліна – ад 25 да 55, клубніцы – ад 12 да 55.