Мінадукацыі Беларусі ўстанавіла новыя правілы адзнак у ВНУ

Зацверджаны тры віды атэстацыі.

Мінадукацыі Беларусі ўстанавіла новыя правілы адзнак у ВНУ. Адпаведная пастанова апублікавана 7 снежня на Нацыянальным прававым партале. Мінабр зацвердзіў тры віды атэстацыі студэнтаў, курсантаў і слухачоў, якія вучацца ў беларускіх ВНУ.

На працягу семестра не менш як адзін раз па кожнай вучэбнай дысцыпліне або модулі вучэбнага плана праводзіцца бягучая атэстацыя. Гэта можа быць тэст, рэферат, кантрольная работа, эсэ, калёквіум, экспрэс-апытанне на аўдыторным занятку, апытанне, вучэбнае заданне, творчая работа, справаздача аб выкананні лабараторных даследаванняў, творчых і даследчых заданняў і г.д.

Вышэйшы бал бягучай атэстацыі – 10. Таксама гэта можа быць адзнака «абараніў(ла)» з выстаўленнем ацэнкі, «залічана» або «не залічана». Пры гэтым указваецца, што станоўчымі лічацца адзнакі вышэйшыя за 4 балы, «залічана» і «абараніў(ла)» з ацэнкай не ніжэй за 4 балы. Усе астатнія адзнакі будуць лічыць нездавальняючымі. Пры атрыманні «нездавальняючай» студэнту дазваляюць пераздачу.

За семестр праводзіцца прамежкавая атэстацыя – у форме іспыту, заліку, абароны курсавой працы або дыферэнцыраванага заліку па практыцы. Магістранты могуць таксама прайсці прамежкавую атэстацыю, здаўшы кандыдацкі іспыт па агульнаадукацыйнай дысцыпліне. Згодна з дакументам, калі атрыманая за іспыт ацэнка не задаволіць студэнта, ён мае права пераздаць яго на працягу ўсяго тэрміну навучання, але пераздаваць можна не больш за тры дысцыпліны.

Нарэшце, падагульняючая атэстацыя можа праводзіцца ў форме дзяржэкзамену, а таксама дзяржэкзамену і абароны дыпломнай або магістарскай работы. Ацэнка выстаўляецца па 10-бальнай шкале.