Самалёт з футбалістамі экстранна сеў у Даніі праз пагрозу выбуху 30 мячоў
- 2.02.2023, 20:24
- 6,538
Пасля пасадкі высветлілася, што мячы ўсё ж былі спушчаныя.
Самалёт з гульцамі швэдскага «Гётеборга» здзейсніў экстранную пасадку ў аэрапорце Капенгагена, бо пілот даведаўся пра магчымую пагрозу выбуху 30 футбольных мячоў у багажным аддзяленні, паведамляе Aftonbladet, журналіст якога быў на борце.
Каманда накіроўвалася на зборы ў гішпанскую Торэўеху. Праз 30-40 хвілін палёту камандзір паветранага судна паведаміў, што мае «дзіўную аб'яву»: «Нам стала вядома, што ў нас на борце блізу 30 надзьмутых мячоў. Праз небяспеку іх выбуху нам трэба здзейсніць пасадку ў Капенгагене».
Як паведаміў экіпаж, пасля вылету з ім звязаліся супрацоўнікі аэрапорта Гётэборга і сказалі, што забыліся папярэдзіць аб мячах, выказаўшы здагадку, што яны былі напампаваныя.
Са слоў пілота, прыпыненне у сталіцы Даніі мела заняць блізу паўгадзіны, каб паспець спусціць мячы, ён таксама прынёс прабачэнні за невыгоды.
Пасля пасадкі высветлілася, што мячы ўсё ж былі спушчаныя.
У клубе заявілі, што спусцілі ўсе мячы перад вылетам, самалёт у выніку пасадзілі дзеля «фальшывай трывогі», але гэта было выключна пастановай авіякампаніі ды экіпажа, таму яны не чакаюць патрабаванняў аб кампенсацыі.