Пуцін прысвоіў ганаровае званне брыгадзе, чый «Бук» збіў MH-17
11- 21.02.2023, 17:24
- 7,298
Гэта падраздзяленне фігуруе ў расследаванні Гаажскага суда.
Пуцін прысвоіў званне «гвардзейскай» 53-й зенітнай ракетнай брыгадзе. Як указана ў дакуменце, апублікаваным на партале прававой інфармацыі, брыгада ўзнагароджаная за «масавы гераізм і адвагу, стойкасць і мужнасць, праяўленыя асабовым складам брыгады ў баявых дзеяннях па абароне Айчыны», піша The Moscow Times.
Гэта падраздзяленне фігуруе ў расследаванні аб збітым над Данецкай вобласцю лайнеры Малайзійскіх авіяліній 17 ліпеня 2014 года. На борце самалёта знаходзіліся 298 чалавек, усе яны загінулі.
Суд у Нідэрландах падтрымаў высновы міжнароднага следства, якое ўстанавіла, што менавіта 53-й зенітнай ракетнай брыгадзе належаў «Бук», з якога збілі Boeing.
У 2016 годзе Bellingcat апублікаваў вынікі двухгадовага расследавання ў дакладзе «MH17 – патэнцыйныя падазраваныя і сведкі з 53-й зенітна-ракетнай брыгады». У дакуменце была пададзеная вычарпальная інфармацыя па структуры, узбраенні, асабовым складзе і гісторыі гэтай воінскай часткі, а таксама інфармацыя аб яе месцы ў іерархіі Узброеных сіл Расеі. Суд у Гаазе, які разглядаў справу, хацеў дапытаць камандзіра брыгады Сяргея Мучкаева ў якасці сведкі, аднак Расея гэты запыт Нідэрландаў адхіліла.
У лістападзе 2022 года акруговы суд Гаагі завочна прысудзіў былога «міністра абароны» самаабвешчанай «Данецкай народнай рэспублікі» Ігара Гіркіна да пажыццёвага зняволення паводле справы аб збітым у 2014 годзе пасажырскім «Боінгу». Аналагічныя завочныя прысуды атрымалі яшчэ двое фігурантаў справы: афіцэр ГРУ ў адстаўцы Сяргей Дубінскі і камандзір выведпадраздзялення ГРУ «ДНР» Леанід Харчанка.