Нямеччына і Польшча плануюць склікаць «танкавую кааліцыю»

Ужо на наступным тыдні.

Заходнія партнёры могуць паставіць Украіне першы батальён баявых танкаў Leopard 2 на працягу трох або чатырох месяцаў з пачатку года. Пра гэта заявіў у сераду, 8 лютага, міністр абароны Нямеччыны Барыс Пісторыюс падчас візіту ў Варшаву, перадае DW.

«Мы маглі б паставіць прынамсі адзін батальён у першыя чатыры, а можа быць, і тры месяцы гэтага года, і затым нам, натуральна, трэба будзе дзейнічаць як мага хутчэй», - указаў Пісторыюс, дадаўшы, што батальён будзе складацца прыкладна з 31 танка.

Кіраўнік міністэрства таксама паведаміў, што Нямеччына і Польшча хочуць склікаць сустрэчу краін, якія плануюць паставіць Украіне Leopard 2. Такі фармат будзе служыць збліжэнню інтарэсаў гэтых дзяржаў, дадаў Пісторыюс пасля сустрэчы з польскім міністрам нацыянальнай абароны Марыюшам Блашчакам у Варшаве.