У аэрапорце Менска затрымалі футбаліста з Нігерыі

У яго быў выяўлены фальшывы пашпарт.

У Менску на памежным кантролі затрымалі іншаземца з падробленым пашпартам. Падрабязнасці паведамілі ў Дзяржаўным памежным камітэце.

Інцыдэнт адбыўся ўначы 11 сакавіка. Грамадзянін Нігерыі прыбыў у Беларусь са Стамбула. Аднак на пашпартным кантролі мужчына паказаў пашпарт грамадзяніна Ганы. Памежнікі заўважылі падробку - замену старонкі з устаноўчымі звесткамі.

Высветлілася, што замежнік сам падрабіў дакумент і змяніў свой век, каб прафесійна займацца футболам у сябе на радзіме. А ў Беларусі ён планаваў прадоўжыць кар'еру гульца. Сапраўдны пашпарт мужчыны быў схаваны сярод ягоных асабістых рэчаў.

- Затрыманага замежніка змясцілі ў ізалятар ГУУС Менскага выканкама, - пракаментавалі ў ДПК.

Нігерыйцу пагражае адміністрацыйная адказнасць за спробу незаконнага пераходу мяжы, а таксама - крымінальная за выкарыстанне падробленага дакумента.