«Незадоўга да смерці ён з'ездзіў да бацькоў»
7- 21.03.2023, 19:10
- 14,466
![«Незадоўга да смерці ён з'ездзіў да бацькоў»](https://i.c97.org/ai/540924/aux-head-1679415016-20230313_soldat_360.jpg)
У версію пра суіцыд знаёмыя сям'і 19-гадовага салдата тэрміновай службы, які загінуў на беларуска-польскай мяжы, не вераць.
Цела вайскоўца-тэрмінавіка знайшлі днём 20 сакавіка ў аддзяленні памежнага кантролю «Высока-Літоўск», якое знаходзіцца ў вёсцы Абяроўшчына Камянецкага раёна. Дзяржаўны памежны камітэт паведаміў, што 19-гадовы салдат учыніў суіцыд. Як стала вядома «Люстэрку» ад блізкіх сям'і памерлага, маладога чалавека звалі Роберт Цімафееў і ў войску ён служыў кухарам.
Сваякі сям'і, з якімі звязалася «Люстэрка», пацвердзілі, што ў заяве Дзяржпамежкамітэта сапраўды гаворка ідзе пра Роберта Цімафеева, аднак іншых дэталяў не расказалі. У версію пра суіцыд яны не вераць.
Расказаць пра маладога чалавека пагадзіўся ягоны знаёмы, які добра ведае сям'ю салдата. Паводле ягоных словаў, у маладога чалавека было пяць братоў і сясцёр і да войска ён разам з імі жыў у Менску.
– Гэта цудоўная і вельмі дружная сям'я! Яны вернікі, вельмі шмат займаюцца хрысціянскім служэннем. Дапамагаюць іншым, – кажа чытач. – Раней у бацькоў было прозвішча Цімафеевы. Але яны надумалі перайсці на сваё нямецкае Крэйбрынг, бо з'яўляюцца этнічнымі немцамі. Праўда, ці змяніў прозвішча Роберт, не ведаю. Яны збіраліся эміграваць у Нямеччыну, дзе жывуць іхнія сваякі, але не паспелі падрыхтаваць усе дакументы і выехаць з краіны. А потым яго прызвалі ў кастрычніку летась. Бацькі таксама пастанавілі застацца, пакуль сын у войску.
Да службы ў памежных войсках Роберт вучыўся на кухара, расказвае знаёмы хлопца.
– Потым Роберту далі магчымасць з'ездзіць у Менск і наведаць бацькоў. Як я разумею, гэта была іх апошняя сустрэча, – кажа суразмоўца. – Што адбылося з Робертам? Баюся, пра гэта мы можам ніколі не даведацца. Камандаванне часткі, напэўна, будзе ўсё адмаўляць і выстаўляць смерць Роберта як суіцыд (нават калі гэта не так), каб зняць з сябе ўсю адказнасць. Але ўсім нам вельмі не зразумела: як ён апынуўся на нейкім там КПП? Бо ягонае месца ў гарачым цэху салдацкай сталоўкі. А тут, я так разумею, ён знаходзіўся з табельнай зброяй.