Масавы сыход з Беларусі IT-кампаній прадаўжаецца

IT-кампаніі Gurtam і Akveo закрываюць беларускія юрыдычныя асобы.

Такая інфармацыя з'явілася на сайце адзінага дзяржрэгістра, піша devby.io. Gurtam афіцыйна ліквідуе кампанію ў Беларусі з 28 лютага, Akveo – з 9 студзеня.

Gurtam

Беларуская ІТ-кампанія Gurtam заснаваная ў 2002 годзе. Заснавальнікі – Аляксей і Уладзімір Шчурко.

Кампанія стварыла платформу для спадарожнікавага маніторынгу Wialon, а таксама платформу flespi для паскоранай распрацоўкі геалакацыйных ідэяў. Да Wialon падключана больш за 3,5 мільёна машынаў і іншых аб'ектаў у 150+ краінах свету. Софт выкарыстоўваюць сотні тысячаў кампаній па ўсім свеце: ад сэрвісаў у дастаўцы піцы і таксапаркаў да нафтавых карпарацый і дзяржаўных службаў.

Офісы кампаніі адкрытыя ў 5 краінах: Літва, Грузія, ААЭ, Аргенціна, ЗША. У Gurtam працуе блізу 300 адмыслоўцаў. Раней асноўная каманда працавала ў Беларусі (200+ чалавек). Цяпер асноўная частка каманды працуе ў Літве, дзе знаходзіцца галаўны офіс кампаніі. Штат літоўскага офіса вырас за мінулы і гэты год у 4 разы – з 40 да 170 чалавек.

У ліпені 2020 года ў Менску сілавікі затрымалі дырэктара Wialon (платформы для спадарожнікавага маніторынгу Gurtam) Аляксандра Куўшынава. Ён апынуўся ў адным аўтазаку са сваім братам Віктарам Куўшынавым – мэнэджэрам у прадукце PandaDoc. Іх асудзілі да 10 і 11 сутак арышту (нібыта за парушэнне парадку). Пазней Віктар трапіў у СІЗА паводле справы PandaDoc, а Аляксандр з'ехаў з Беларусі спачатку ў Турцыю, потым ва Украіну, а пазней у Літву.

У лютым 2022 года пасля пачатку вайны ва Украіне Gurtam дала ўкраінскім кампаніям бясплатны доступ да хмарных сэрвісаў на 6 + месяцаў. У сакавіку кампанія прыпыніла продажы сваіх прадуктаў у Расеі, а ў снежні ліквідавала расейскую юрыдычную асобу.

Akveo

Кампанія ўтвораная ў 2015 годзе. Заснавальнікі – Канстанцін Даноўскі, Уладзімір Лугоўскі. Пачыналі сваю кар'еру як распрацоўнікі ў буйной аўтсорсінгавай кампаніі.

Akveo займаецца распрацоўкай уласных праграмных прадуктаў для вэбу і мабільных ідэяў (ngx-admin, Kitten Tricks і іншыя). Прадукты ўжываюцца ў аўтамабільнай, турыстычнай, банкаўскай, медыцынскай, тэлекамунікацыйнай і адукацыйнай галінах.

Офісы кампаніі адкрытыя ў Дэнверы і Вільні. Увосень летась Akveo зарэгістравала юрыдычную асобу ў Варшаве.

У кампаніі працуе блізу 100 адмыслоўцаў. Асноўная каманда раней працавала ў Менску, цяпер – у Літве і Польшчы. Сярод іншага, за мінулы і гэты год штат літоўскага офіса вырас з 3 да 26 чалавек. У Польшчы, мяркуючы з інфармацыі з профіляў супрацоўнікаў у LinkedIn, працуе блізу 60 чалавек.

Хто ліквідуецца цяпер

Devby.io знайшоў яшчэ некалькі IT-кампаній, якія сышлі ў ліквідацыю сёлета.

«ПЦІ Салюшнс»

Кампанія была створаная ў кастрычніку 2020 года. Займалася распрацоўкай ПЗ Заснавальнік кампаніі – экс-дырэктар менскай PandaDoc Дзмітрый Рабцэвіч. У пачатку верасня 2020 яго разам з трыма іншымі супрацоўнікамі кампаніі затрымалі паводле справы PandaDoc. Пасля выхаду з СІЗА ён зарэгістраваў новую кампанію. Юрыдычны адрас «ПЦІ Салюшнс» супаў з юрыдычным адрасам PandaDoc (была ліквідаваная ў 2021). Таксама кампанія патрапіла ў лік рэзідэнтаў ПВТ.

Пра «ПЦІ Салюшнс» няма ніякай інфармацыі (штат, праекты, планы) за выключэннем сферы дзейнасці.

«Фрэшлі Дата»

Кампанія створаная ў студзені 2019 года, была вылучаным цэнтрам распрацоўкі ПЗ амерыканскай кампаніі Freshly. Распрацоўвала ПЗ для аўтаматызацыі бізнэс-працэсаў у сферы электроннага гандлю з выкарыстаннем хмарных тэхналогій і штучнага інтэлекту. З кастрычніка 2019 года – рэзідэнт ПВТ.

«Інэвейт Юроп»

Кампанія была створаная ў 2019 годзе як цэнтр распрацоўкі міжнароднай групы кампаній ENAVATE. Займалася стварэннем сістэмаў і хмарных сэрвісаў для спрашчэння і аўтаматызацыі бізнэс-працэсаў. У штаце ENAVATE блізу 250 супрацоўнікаў, у Беларусі працавала блізу 20 чалавек. Са снежня 2019 года – рэзідэнт ПВТ.

Хто ўжо сышоў

Летась здарыўся масавы сыход з Беларусі IT-кампаній, у тым ліку прадуктовых. Сёлета спіс прадаўжае папаўняцца. На гэты момант у ім такія вядомыя кампаніі з беларускімі каранямі, як Wargaming, OneSoil, Flo, Targetprocess, Fibery, Vochi, Wannaby, Playgendary, Verv.

Хто застаўся

З вядомых прадуктовых кампаній з беларускімі каранямі ў краіне прадаўжаюць працаваць, сярод іншых, SayGames, Belka Games, Gismart, Easybrain. Сярод замежных кампаній захавалі свае офісы ў Беларусі: Playtika, Mapbox, Rakuten Viber, SK Hynix.