Літоўскія памежнікі назвалі прычыну чэргаў, якія павялічыліся, на мяжы

Павелічэнне колькасці афіцэраў і памежнікаў не дапамагло б.

У Дзяржаўнай памежнай службе Літвы (VSAT) паведамілі, што сапраўды сталі павольней правяраць аўто, якія ідуць з і ў Беларусь. Але рэч не ў ляноце памежнікаў і мытнікаў, а наадварот, у стараннасці.

Прэс-сакратар ведамства Гедрус Мішуціс распавёў, што самі літоўскія памежнікі за пару хвілін правяраюць дакументы, піша LRT. А вось нагрузка мытнікаў значна большая, бо ім трэба шукаць кантрабанду і падсанкцыйныя тавары.

«Паколькі ў дачыненні да Расеі, Беларусі ўведзены санкцыі, груз санкцыянаваны, яго правяраюць нашыя калегі з мытні, што, натуральна, займае больш часу. Памежнік правярае дакумент за дзве хвіліны, але даўжэйшыя мытныя працэдуры, даўжэй правяраецца грузавік», - распавёў прадстаўнік прэс-службы VSAT.

Цяпер стала зразумела, чаму ў ДПК Беларусі ўвесь час узгадваюць нейкія нормы пропуску аўтамабіляў. Проста ў Літве і Польшчы яны знізіліся пасля ўвядзення санкцый.

Чэргі на мяжы Літвы і Беларусі павялічыліся і праз пастанову ўладаў Польшчы закрыць частку КПП. У выніку многія перавозчыкі пераарыентаваліся на перасячэнне менавіта літоўскай мяжы.

«Натуральна, што пры такой загрузцы КПП са сваёй інфраструктурай, якія да гэтага не прыстасаваныя, проста не могуць абслугоўваць такую колькасць грузавікоў. Павелічэнне колькасці афіцэраў і памежнікаў не дапамагло б, бо на пункце некалькі палос руху і яны проста занятыя. Як у Вільні бываюць заторы пасля працы або раніцай, так і там, другая прычына - гэта інфраструктура, якая не можа вытрымаць такую нагрузку», - падкрэсліў ён.

Гедрус Мішуціс назваў сярод прычын з'яўлення чэргаў і «нераўнамерную працу» памежных і мытных службаў Беларусі. Аднак прадстаўнік VSAT не стаў драматызаваць бягучую сітуацыю і згадаў, што былі дні і горшыя.

«Час чакання грузавіка, які стаяў у канцы чаргі, у Райгардзе, перасячэнне мяжы давялося б чакаць 37 гадзін, у Шальчынінкаі - 48 гадзін, у Медніках - 69 гадзін, а ў Лаварышкес у 21», - адзначыў ён.

«Яны (чэргі — Рэд.) там увесь час, можа, зараз крыху даўжэй, але былі дні і горшыя. Цяпер я б не сказаў, што сітуацыя жахлівая, але чэргі крыху даўжэйшыя, чым звычайна», — сказаў Гедрус Мішуціс.