Латвійская чыгунка забараніла перавозку ўсіх грузаў у вагонах БЧ

Поўнасцю будуць спыненыя перавозкі нафтапрадуктаў з Беларусі.

Латвійская чыгунка забараніла перавозку ўсіх грузаў у вагонах інвентарнага парку Беларускай чыгункі, паведамляе Супольнасць чыгуначнікаў Беларусі.

Забарона была ўведзеная 23 сакавіка, але вядома пра яе стала толькі сёння. Пад «бан» патрапіла не толькі сама БЧ, але і іншыя перавознікі, якія арандуюць у яе вагоны.

Праўда, забарона не закране вагоны іншых уласнікаў, пішуць чыгуначнікі. Гэта азначае, што, напрыклад, «Беларуськалій» зможа прадаўжаць перавозіць прадукцыю праз Латвію ў сваіх вагонах.

Аднак поўнасцю будуць спыненыя перавозкі нафтапрадуктаў з Беларусі, таму што цыстэрны для гэтага ёсць толькі ў Беларускай чыгункі.