Што з 1 красавіка будзе з бязмытнымі лімітамі на ўвоз тавараў з-за мяжы

І колькі давядзецца заплаціць за перавышэнне.

Дзяржаўны мытны камітэт растлумачыў, якія бязмытныя нормы ўвозу тавараў будуць дзейнічаць у Беларусі з 1 красавіка. Размова як пра тыя тавары, якія ўвозяць наземным транспартам для асабістага карыстання, так і пра пасылкі з-за мяжы. Нагадаем, раней у ДМК анансавалі, што з наступнага месяца прыкметна зрэжуць «столь» у таварах, але на ўзроўні ЕАЭС прадоўжылі тэрмін дзеяння падвышаных лімітаў.

У ДМК пацвердзілі, што Беларусь будзе прытрымлівацца пастановы ў бязмытных лімітах на тавары з-за мяжы, якую прынялі на ўзроўні ЕАЭС. Нагадаем, раней наша краіна на нацыянальным узроўні ўводзіла паніжаныя ліміты на такія тавары, хоць у іншых краінах звязу яны былі вышэйшыя.

Нагадаем, 30 сакавіка Еўразійская эканамічная камісія прадоўжыла дзеянне падвышаных лімітаў на ўвоз тавараў з-за мяжы для асабістага карыстання. Да 1 кастрычніка 2023 года «столь» на адну пасылку з-за мяжы складае 1000 еўраў і 31 кілаграм на адну бандэроль. Такія ж абмежаванні і на правоз тавараў наземным транспартам для асабістага карыстання.

Гэтыя ліміты ўвялі ў красавіку 2022 года на ўзроўні краінаў ЕАЭС, іх вызначылі да 1 кастрычніка, а потым прадоўжылі яшчэ на паўгода – да 1 красавіка 2023 года. Беларусь таксама выкарыстоўвала гэтыя нормы на сваёй тэрыторыі.

Колькі давядзецца заплаціць за перавышэнне ў таварах з-за мяжы

У ДМК растлумачылі, колькі давядзецца заплаціць, калі перавысіць бязмытныя ліміты ў кошце або вазе.

Калі размова пра ўвоз тавараў наземным транспартам для асабістага карыстання, то за перавагу давядзецца заплаціць 30% ад кошту, але не менш за 4 еўры за 1 кілаграм вагі. Прычым спаганяць будуць менавіта з таго тавару, што большы за норму, а не з усяго.

Пры пасылках з-за мяжы за перавышэнне трэба будзе заплаціць у два разы менш – 15% ад кошту, але не менш за 2 еўры за 1 кг вагі ў частцы перавышэння.