Польшча гатовая выдаць Украіне знішчальнікі МіГ-29
5- 8.03.2023, 21:50
- 8,166
Пра гэта паведаміў прэзідэнт Польшчы.
Польшча гатовая перадаць свае знішчальнікі МіГ-29 Украіне ў рамках міжнароднай кааліцыі, заявіў прэзідэнт Анджэй Дуда ў сераду ў інтэрв'ю CNN International у Абу-Дабі. Ён дадаў, што ў будучыні Украіна атрымае самалёты F-16.
«Астатнія МіГ-29, якія ёсць у нас у Польшчы і якія цяпер служаць у нашых ВПС, - мы гатовы паставіць гэтыя самалёты, і я ўпэўнены, што Украіна будзе гатовая іх выкарыстоўваць неадкладна», - сказаў ён.
Дуда адзначыў, што мяркуе, што ўкраінскія ўзброеныя сілы ў будучыні захочуць імкнуцца да стандартаў NАТО і будуць выкарыстоўваць F-16. - «Так што падрыхтоўка ўкраінскіх лётчыкаў важная і вельмі патрэбная», - дадаў ён.
Пры гэтым ён падкрэсліў, спасылаючыся на сваю размову з прэзідэнтам Украіны Уладзімірам Зяленскім, што цяпер ключавой вайсковай патрэбнасцю краіны з'яўляецца дальнабойная артылерыя.
«У гэты момант больш патрэбная дальнабойная артылерыя, каб адкідаць супраціўніка і пазбягаць прамых сутыкненняў. Таму што расейцы спрабуюць раздушыць Украіну, раздушыць яе вагой сваіх узброеных сіл, сваёй колькасцю і сваёй тэхнікай», - сказаў ён.