Беларус загінуў у аварыі ў Бранскай вобласці
- 9.03.2023, 21:39
- 6,022
Сутыкнуліся аўтобус і два грузавікі.
Раніцай 9 сакавіка ў Бранскай вобласці Расеі здарылася аварыя з удзелам аўтобуса і двух грузавікоў. У ёй загінуў беларус, паведамляе амбасада Беларусі ў Расеі.
ДТЗ з удзелам пасажырскага аўтобуса і двух грузавых аўтамабіляў адбылося ў 10.15 у чацвер на 165-м кіламетры дарогі Арол – Смаленск.
– Кіроўца рэйсавага пасажырскага аўтобуса Huyndai не справіўся з кіраваннем і выехаў на паласу сустрэчнага руху, дзе дапусціў датычнае сутыкненне з грузавым аўтамабілем DAF, пасля чаго – лабавое сутыкненне з другім грузавым аўтамабілем DAF, – піша выданне «Бранская вуліца» са спасылкай на звесткі следства.
Загінулі тры чалавекі, у тым ліку 62-гадовы грамадзянін Беларусі – кіроўца аднаго з грузавікоў.
– Аддзяленне амбасады Беларусі ў Смаленску працуе ў кантакце з управай МУС Расеі Бранскай вобласці і ўправай Следчага камітэта Расеі Бранскай вобласці ў мэтах высвятлення абставінаў трагедыі, – гаворыцца ў паведамленні амбасады.