У Беларусі вучацца ліквідаваць наступствы ракетных і авіяўдараў
5- 29.05.2023, 19:41
- 5,086
Cпецыяльныя вучэнні праводзяцца з 29 траўня.
У Беларусі вучацца ліквідаваць наступствы ракетных і авіяўдараў умоўнага ворага. З 29 траўня ў беларускім войску праводзяцца спецыяльныя вучэнні. Як паведамляе прэс-служба Мінабароны Беларусі, імі кіруе намеснік міністра абароны па ўзбраенні генерал-маёр Андрэй Федзін. Задзейнічаныя органы вайсковага кіравання і воінскія часці тэхнічнага забеспячэння, вайсковаабавязаныя, прызваныя ў згаданыя падраздзяленні.
Падчас вучэнняў, якія працягнуцца да 2 чэрвеня, адпрацоўваюцца таксама «пытанні забеспячэння злучэнняў і воінскіх часцей ракетамі і боепрыпасамі, павышэння жывучасці сіл і сродкаў тэхнічнага забеспячэння».
Сёлета ў нашай краіне неаднаразова адпрацоўвалі размеркаванне вайсковай авіяцыі па запасных аэрадромах, у тым ліку цывільных. Звычайна такія трэніроўкі праходзяць у чаканні вайны і ўдараў супраціўніка па вайсковых аэрадромах.
У сярэдзіне траўня Аляксандр Лукашэнка заявіў, што ў Беларусі войскі СПА знаходзяцца ў падвышанай баявой гатоўнасці. Здарылася гэта пасля знішчэння ўкраінцамі ў Бранскай вобласці расейскай авіягрупы.