ГУР правяла маштабную кібератаку на абаронны завод РФ

Прадпрыемства вырабляе дэталі для расейскай бранятэхнікі.

Адзін з заводаў, які вырабляе дэталі для расейскай бранятэхнікі, зазнала маштабную кібератаку. Гаворка ідзе пра іжэўскі завод «Донвард – Гідраўлічныя сістэмы».

Аб гэтым РБК-Украіна паведамілі крыніцы, блізкія да ўкраінскай выведкі.

Праца завода ўскладненая

Паводле слоў субяседніка, сама вытворчасць поўнасцю не спыненая, але работа завода максімальна ўскладненая. Ён удакладніў, што ў выніку атакі былі знішчаныя сеткавыя файлавыя сховішчы (NAS) аб'ёмам 50 тэрабайт, а таксама ільвіная дзель праектнай дакументацыі і чарцяжоў доследна-канструктарскіх работ за перыяд з 2007 года да цяперашняга часу.

Кліенцкая база звестак знішчаная

«Знішчана кліенцкая база звестак. Зашыфравана даменная сетка (кампутары і сервернае абсталяванне) больш як на 200 прылад. Выдаленыя ўсе копіі звестак. Парушанае штатнае функцыянаванне праграм 1С, СКП (сістэма кіравання падборам персаналу), PML (сістэма кіравання жыццёвым цыклам вытворчасці), PDM (арганізацыйна-тэхнічная сістэма забеспячэння кіраваннем усёй інфармацыяй аб вырабах)», - дадала крыніца.

Аднаўленне інфармацыі зойме больш за месяц

Акрамя таго, праведзены так званы «дэфейс» афіцыйнага сайта кампаніі – выдаленне web-старонак і замена іх на іншыя. Цяпер сайт «Донвард» закрыты правайдэрам без тлумачэнняў. Са звестак выдання, адміністратары сеткі апавясцілі супрацоўнікаў аб нападзе, але не могуць назваць дакладныя тэрміны аднаўлення.

«Чакаецца, што праграмнае забеспячэнне лакальна пачне працаваць цягам трох дзён. На хаця б частковае аднаўленне інфармацыі спатрэбіцца больш за месяц. Зрэшты, многія звесткі страчаныя канчаткова. Цяпер супрацоўнікі «Донварда» ліхаманкава ўспамінаюць, як працавалі ў дакампутарную эру», - адзначыў інфармаваны суразмоўца РБК-Украіна.

Хто стаіць за атакай

Афіцыйна адказнасць за атаку ўзяла на сябе хакерская групоўка «TWELVE», якая ў красавіку гэтага года «паклала» серверы федэральнай мытнай службы РФ.

Аднак, паводле інфармацыі выдання, акцыі такіх маштабаў, як правіла, праходзяць пры супрацоўніцтве з украінскімі спецслужбамі. Са звестак крыніц РБК-Украіна, за атакай на «Донвард» стаяць кіберсілы ГУР Мінабароны Украіны.