У Маскве ўзмацнілі глушэнне GPS пасля налёту беспілотнікаў

Пасажыры і кіроўцы таксовак сутыкнуліся з праблемамі.

Пасля масаванага нападу дронаў на Маскву ў сталіцы ўзмацнілі глушэнне GPS. Пра гэта паведамілі ў «Яндэкс.Таксі».

«Апошнім часам у сталічным рэгіёне назіраюцца праблемы з вызначэннем геапазіцыі. <…> Такое адбываецца і цяпер, толькі закранае большую колькасць месцаў у рэгіёне», - гаворыцца ў паведамленні кампаніі.

«Яндэкс.Таксі» падключыла ў сваім дадатку спецыяльную функцыю, якая папярэджвае карыстальніка аб збоях у вызначэнні геапазіцыі. «Цяпер на экране таксі можа з'явіцца значок «Праблемы з геалакацыяй». Гэта значыць, што трэба праверыць сваё месцазнаходжанне на мапе і на ўсялякі выпадак патэлефанаваць кіроўцу, каб зарыентавацца, дзе вас забраць», - заявілі ў кампаніі.

Улады пачалі глушыць GPS у цэнтры горада пасля нападу беспілотнікаў на Крэмль у пачатку траўня. Сістэма навігацыі працавала са збоямі ў межах Бульварнага і Садовага кольцаў. У «Яндэксе» тады пацвердзілі, што збоі ў працы спадарожнікавай сістэмы ўплываюць на ўсе сэрвісы - ад навігатараў да фітнэс-бранзалетаў. Прыкладанні з вызначэннем геапазіцыі атрымліваюць памылковую інфармацыю ад смартфонаў і планшэтаў, дадалі ў «Яндэксе».

Як паведамляла Baza, сілавікі запусцілі перад 9 траўня сістэму падмены лакацыі GPS. Праз гэта навігатары могуць працаваць са збоямі. Напрыклад, фактычна карыстач прыкладання можа стаяць у цэнтры Масквы на Цвярской, а навігатар будзе паказваць, што чалавек знаходзіцца ля Унукава, піша канал. Навігацыю ў сталіцы глушылі і раней, нават да пачатку вайны, але рабілі гэта толькі побач з Крамлём.

Працу GPS глушаць як мінімум у 15 расейскіх рэгіёнах, пісалі The Moscow Times у пачатку траўня. Плошча падаўлення спадарожнікавай навігацыі пачала расці ў канцы лютага 2023 года. Тады расейскія рэгіёны зазналі самую масавую з пачатку вайны атаку дронаў. Паводле інфармацыі на пачатак сакавіка, зона падаўлення GPS закранае Маскву, некалькі рэгіёнаў Паволжа, а таксама Іванаўскую, Уладзімірскую, Яраслаўскую, Разанскую, Калужскую, Цвярскую, Валгаградскую і Смаленскую вобласці.

30 траўня Масква зазнала масаваны напад дронаў. Паводле інфармацыі Baza і Shot, у нападзе ўдзельнічалі 25-32 дроны, Мінабароны паведаміла аб налёце 8 беспілотнікаў самалётнага тыпу. Ведамства ахарактарызавала напад БПЛА як «тэрарыстычны напад».