Як Беларусь губляе дзяцей

Мінус амаль 20 тысяч за год.

За 2022 год у Беларусі налічвалася амаль на 20 тысяч дзяцей менш, чым годам раней. Такімі тэмпамі краіна не страчвала як мінімум з 2017 года. Гэта вынікае са звестак Белстата, паведамляе «Зеркало».

Белстат апублікаваў статыстыку да Дня абароны дзяцей. З яе вынікае, што на 1 студзеня гэтага года ў нашай краіне было 1 млн 828 тысяч дзяцей да 18 гадоў. Годам раней непаўналетніх у Беларусі налічвалася 1 млн 847 тысяч. Такім чынам, за мінулы год дзяцей у краіне стала на 19 953 менш. Для параўнання: годам раней зніжэнне склала блізу 14 тысяч дзяцей. А да 2020 года колькасць непаўналетніх беларусаў павялічвалася цягам некалькіх гадоў.

З аднаго боку, статыстыка паказвае значнае зніжэнне колькасці дзяцей да 4 гадоў, якіх за год стала на 28,7 тысячы менш. Але наўрад ці гэтае зніжэнне можна растлумачыць дэмаграфічнай хваляй нараджальнасці, бо ў 2020 і 2021 гадах колькасць дзяцей гэтай узроставай групы зніжалася больш актыўна.

Каб параўнаць, як змянялася колькасць дзяцей раней, мы паглядзелі дэмаграфічную статыстыку ў базе звестак Белстата. Там не пазначаныя падлікі непаўналетніх дзяцей, але па ўзроставых групах можна вылічыць колькасць людзей ва ўзросце ад 0 да 19 гадоў. У гэтай статыстыцы бачна, што пасля росту з 2013 года ў 2020-м пачалося зніжэнне людзей гэтай групы, а ў 2022 хуткасць гэтага працэсу павялічылася.