Беларусь «накрылі» замаразкі

Дзе на гэтых выходных тэмпература апускалася ніжэй за нуль?

Беларусаў папярэджвалі, што першыя чэрвеньскія выходныя будуць марознымі. Белгідрамет прадказваў да мінус 2 градусаў начамі на суботу і нядзелю.

Журналісты onliner.by пастанавілі зафіксаваць, якім у выніку быў чэрвеньскі ўік-энд.

Субота

Мапа мінімальнай тэмпературы паветра ў Беларусі з вечара пятніцы да раніцы суботы захавалася ў тэлеграм-канале nadvorie.

«Замаразкі былі. Не пранесла, - адзначыў вядоўца канала. - Халадней за ўсё ў Езярышчы - -0,9°С».

Фіксавалі і тэмпературу паветра каля паверхні глебы, на вышыні два сантыметры.

«Тут наогул да -5°С», – прыкмячае nadvorie. Не пашанцавала Драгічыну, спадзяемся, палескія трускалкі выстаяць.

Нядзеля

Мапу мінімальнай тэмпературы паветра мінулай ноччу, з суботы на нядзелю, яшчэ можна ўбачыць на сайце «Белгідрамета».

Халадней за ўсё было на метэастанцыі «Палеская», там слупок у тэрмометры апусціўся аж на адзнаку -1,1°С.

А на мапу замаразкаў у паверхні глебы наогул балюча глядзець, на той жа «Палескай» было да -6°С.