Стала вядома, якія віды дзейнасці забароняць для ІП у Беларусі

Законапраект ужо прыняты «палатачнікамі» ў першым чытанні.

У Сеціве з'явіўся праект змен для індывідуальных прадпрымальнікаў. У ім прапісаны спіс тыпаў дзейнасці, якімі ІП змогуць займацца ў будучыні. Нагадаем, тыя прадпрымальнікі, дзейнасць якіх не трапляе ў фінальны пералік, будуць вымушаныя або закрыцца, або адкрыць юрыдычную асобу, паведамляе zerkalo.io.

Коратка аб тым, якія змены хочуць увесці чыноўнікі

Чыноўнікі хочуць урэзаць спіс відаў дзейнасці для ІП. Прадпрымальнікі, дзейнасць якіх не трапляе ў скарочаны пералік, будуць вымушаныя або закрыцца, або адкрыць юрыдычную асобу. Так, ІП могуць забараніць займацца аптовым гандлем і выконваць турыстычныя паслугі.

Змены жадаюць увесці таксама для фізічных асоб. Чыноўнікі маюць намер адрэдагаваць Грамадзянскі кодэкс і скараціць спіс відаў дзейнасці, якія не лічацца прадпрымальніцтвам. З яго жадаюць прыбраць, да прыкладу, рамесніцтва, аграэкатурызм, а таксама самазанятых, якія гандлююць на рынках уласнымі выпечкай і мёдам, вырашчанай гароднінай, намаляванымі карцінамі. «Любая дзейнасць фізічнай асобы апрыёры будзе прызнавацца прадпрымальніцкай», - заяўлялі раней у МПЗ з нагоды законапраекта.

Законапраект ужо прыняты «дэпутатамі» ў першым чытанні, наперадзе - другое.

Якія тыпы дзейнасці могуць пакінуць для ІП, а якія - не

Праект са спісам відаў дзейнасці, якімі, як чакаецца, змогуць прадоўжыць займацца ІП, з'явіўся ў Сеціве, яго публікуюць у тым ліку юрысты і падатковыя кансультанты. Наколькі актуальная гэтая версія праекту, невядома. Хутчэй за ўсё гэта адзін з апошніх варыянтаў, якім чыноўнікі надумалі падзяліцца з бізнэс-саюзамі і іншымі зацікаўленымі.

З гэтага праекта вынікае, што ў спіс відаў дзейнасці, якімі могуць займацца ІП, не патрапілі ў тым ліку юрыдычныя паслугі, аптовы гандаль, кур'ерская дзейнасць. Раней паведамлялася, што ІП могуць забараніць займацца аптовым гандлем і выконваць турыстычныя паслугі.

Што да такой сферы дзейнасці як «інфармацыя і сувязь», то з яе жадаюць пакінуць кампутарнае праграмаванне, кансультацыйныя і іншыя спадарожныя паслугі. З адукацыі прапануюць пакінуць толькі «адукацыю ў галіне фізічнай культуры, спорту і адпачынку».

Раздробны гандаль у пераліку застаецца (за выключэннем гандлю аўтамабілямі і матацыкламі).

У праекце змен прагназуюць, што колькасць ІП пасля перагляду відаў дзейнасці можа скараціцца з 263 тысяч (на пачатак гэтага года) да 143,5 тысячы. Пры гэтым колькасць наёмных супрацоўнікаў у іх можа знізіцца з 64, 6 да 47,1 тысяч чалавек.