Расейскі дэпутат адправіўся на вайну ва Украіне, каб не сядзець 9 гадоў за забойства жонкі

Аляксандр Хаконаў уступіў у ПВК.

У Краснаярскім краі РФ былы дэпутат Тасееўскага раённага савета Аляксандр Хаконаў збег на вайну ў складзе ПВК пасля таго, як суд прысудзіў яго да дзявяці гадоў і васьмі месяцаў калоніі строгага рэжыму за забойства жонкі.

Аб гэтым піша партал NGS24 са спасылкай на інфармаваную крыніцу. Паводле версіі следства, Хаконаў забіў жонку 28 сакавіка 2022 года падчас распівання алкаголю. «Мужчына, разгневаны выказваннямі на свой адрас, схапіў нож і нанёс жонцы ўдары ў вобласць грудной клеткі. Ад атрыманых раненняў яна адразу памерла», - распавялі ў пракуратуры.

Як удакладняецца ў тэксце выраку суда, перад гэтым Хаконаў прапанаваў жонцы заняцца сэксам, але «яна адмовілася і стала яго прыніжаць як мужчыну, праз што яны пасварыліся». Пасля забойства 51-гадовы экс-дэпутат пастанавіў пазбавіцца цела 35-гадовай жонкі і вынес яго ў лес. Там ён пакінуў яго каля сметнішча, прысыпаўшы галінкамі і снегам.

29 сакавіка ён заявіў у паліцыю аб знікненні жонкі. З яго слоў, яна нібыта пайшла з дому і не вярнулася. Цела жанчыны знайшлі 1 красавіка, а пазней экс-дэпутат прызнаўся ў забойстве.

«У скаргах на прысуд мужчына апраўдваў забойства «псіхалагічнай навукай»: усяму віною афект, выкліканы цяжкай абразай з боку жонкі. Цяжка абражаны, ён не кантраляваў свае паводзіны. Прасіў суд змякчыць прысуд і ўлічыць у заслугі дабрачынную дзейнасць», - адзначылі ў пракуратуры.

Са слоў крыніцы, пасля абвяшчэння судом прысуду Хаконаў у СІЗА пастанавіў уступіць у ПВК. Аднак у якую менавіта, суразмоўца выдання не ўдакладніў. Экс-дэпутат ужо адправіўся на фронт і пазбег пакарання, дадаў ён.