«Гэта - не змова, але праз гэтыя раёны кошты ў горадзе вышэйшыя»

Чаму ў Берасці квадратны метр каштуе даражэй, чым у іншых рэгіёнах Беларусі?

Той, хто сочыць за нашымі штотыднёвымі маніторынгамі, магчыма, заўважыў адну цікавую тэндэнцыю - квадратны метр у Берасці заўсёды каштуе даражэй, чым у іншых абласных цэнтрах. Прычым, розніца складае не 20-30 даляраў, а 100-150. Няўжо ўсё тлумачыцца блізкасцю польскай мяжы? А можа, горад папулярны ў расейцаў, якія надумалі пераехаць?

Адказаць на пытанне аб берасцейскіх цэнах сайту realt.by дапамог заснавальнік агенцтва нерухомасці «Бугрыэлт», аўтар тэлеграм-канала Wikidom нерухомасць Мікалай Тукін.

Для пачатку падамо факты. Аналіз кошту квадратнага метра за апошні тыдзень у розных рэгіёнах краіны кажа нам, што пакуль у Магілёве, Віцебску і Гомелі сярэдні кошт "квадрата" круціцца вакол 700-750 даляраў, берасцейцы ўжо прадаюць "квадрат" па 874 даляры. Вядома, перш за ўсё, хочацца кіўнуць у бок мяжы - маўляў, там і дадатковы заробак, і падвышаны попыт на жыллё. Але ў Гародні пры такой жа мяжы (побач яшчэ і Літва) кошт метра зараз складае 790 даляраў.

Што ж, а можа ў Берасці проста высокія заробкі, адсюль і больш высокі кошт жылля? Адкрываем статыстыку Нацыянальнага статыстычнага Камітэта за красавік (больш свежай пакуль няма) і бачым, што сярэдні налічаны заробак у краіне на красавік 2023 года ў Магілёўскай вобласці склаў 1 473 рублі, у Віцебскай – 1 547 рублёў, у Берасцейскай – 1568 рублёў, у Гарадзенскай - 1629 а ў Гомельскай - 1646 рублёў (самы высокі пасля Менска і Менскай вобласці). Выходзіць, што справа і не ў сярэднім заробку.

«Гэта - не змова, але калі б гэтых раёнаў не было, кошты ў горадзе былі б ніжэйшымі»

− Магчыма, берасцейцы і зарабляюць крыху больш за ўмоўны Магілёў ці Віцебск, але асноўная прычына высокага кошту квадратнага метра крыецца ў наяўнасці ў Берасці большай колькасці сучасных шматпавярховых дамоў, якія ўзводзяцца прыватнымі кампаніямі. Як правіла, прыватныя забудоўшчыкі будуюць у горадзе маналітныя ці цагляныя дамы, што мае на ўвазе іншы камфорт для жыхароў, але і адпаведна іншую сабекошт, - кажа Мікалай Тукін. − І калі мы глядзім базу ўгод у Берасці, то там адразу ж бачна, што ёсць шэраг раёнаў, дзе пераважаюць маналітныя дамы, яны і паказваюць кошт метра на парадак вышэйшы за іншыя.

Экспэрт тлумачыць, што ў параўнанні з іншымі абласнымі цэнтрамі ў Берасці вышэйшая дзель сучасных жылых кварталаў не панэльнага тыпу. Вядома, у Берасці ёсць звычайныя панэльныя кварталы, якія прыкладна аднолькава выглядаюць ва ўсіх гарадах, але менавіта сярод новабудоўляў панэлі тут менш, чым у іншых абласных цэнтрах.

− Я кажу пра такія раёны, як Папаніна, Гогаля, Махновіча, Марозава, Вараўскага і іншыя, дзе кошт метра на другасным рынку дасягае 900-1100 даляраў. У процівагу ім ёсць і старыя раёны - такія, як Усход, Вулька, Дуброўка, Кавалёва, - там кошты раўняюцца 700-900 даляраў. Плюс, як і ва ўсіх гарадах, у Берасці ёсць не самыя папулярныя раёны, кшталту Граеўкі, Рэчыцы, Дуброўкі, дзе метр можа каштаваць каля 500-700 даляраў.

Паводле слоў Мікалая Тукіна, менавіта з-за гэтага статыстыка і выдае сярэднюю цану метра ў Брэсце ў раёне 800-850 даляраў, якая на 100-150 даляраў вышэйшая, чым у астатніх абласных гарадах.

- Гэтая цана складаецца за кошт таго, што штомесяц каля 15-20% здзелак тычыцца новых раёнаў з маналітнымі дамамі. Калі б гэтых раёнаў не было, то і цэны ў горадзе былі б на 100 даляраў з «квадрата» меншыя, як мінімум.

Цікава, што некаторыя людзі бачаць у высокім кошце метра схаваны сэнс ці нават змову - тыпу ў берасцейцаў вышэйшыя даходы, побач - мяжа і ўсё такое.

− Напраўду за такія кошты горад павінен у добрым сэнсе сказаць дзякуй мясцовым прыватным забудоўшчыкам, якія будуюць маналітныя кварталы ў процівагу тыпавым панэльных дамоў, а таксама і ўладам, якія праводзяць аўкцыёны і прадаюць зямлю пад жылое будаўніцтва прыватным забудоўшчыкам.

Дарэчы, чуткі аб тым, што кватэры ў Берасці скупляюць расейцы, таксама не адпавядаюць рэчаіснасці. Гэты міф мы ўжо зняпраўджвалі. Паводле статыстыкі, пакупнікі з Расеі складаюць на берасцейскім рынку 2-3% ад агульнай колькасці.