«Неймаверная колькасць сваякоў Кадырава чакае моманту»

На фоне вестак з Крамлёўскай лякарні Чачэнія ператварылася ў парахавую бочку.

Кадыраў стварыў у Чачэніі гіганцкую фінансавую і «паняційную» імперыю, і ў выпадку ягонай смерці можа пачацца яе перадзел, распавёў у эфіры праграмы «Воздух» журналіст Павел Каныгін, які назірае за сітуацыяй у рэспубліцы. Так ён пракаментаваў новыя чуткі аб тым, што Кадыраў знаходзіцца пры смерці і ў яго нырачная недастатковасць, піша "Можем объяснить".

Калі чуткі аб хваробе Кадырава праўдзівыя, то яго павінна хваляваць бяспека сям'і, паказвае Каныгін. «У Рамзана Ахматавіча шмат ворагаў, яны чакаюць моманту, калі яго ўлада аслабне настолькі, каб можна было разбіць гэтую імперыю і астатніх прадстаўнікоў ягонага клана».

«Ёсць Ямадаевы, ёсць і іншыя кланы, у тым ліку і за межамі Чачэнскай рэспублікі, - пералічвае госць праграмы. - У гэтага чалавека шмат ворагаў і ў яго даволі вялікае багацце».

Са слоў Каныгіна, ворагі Кадырава настроеныя самым рашучым чынам — за забітых сваякоў і паплечнікаў яны будуць імкнуцца адказаць тым жа ягонай сям'і.

«(У Кадырава) неймаверная колькасць родзічаў, пра іх шмат кажуць і ў самой Чачэніі, - канстатуе журналіст. - Дзеці Кадырава - гэта яго ўразлівасць. Нездарма адзначаюць, што Кадыраў вельмі актыўна прапіхвае сваіх дзяцей на розныя публічныя мерапрыемствы. Яны ўдзельнічаюць у сустрэчах з Пуціным, з іншымі вышэйшымі чыноўнікамі, з'яўляюцца, фатаграфуюцца, удзельнічаюць у пратакольных здымках... Гэта ўспрымалі так, што ён рухае іх у якасці пераемнікаў, спрабуе нейкіх стаўленікаў пазначыць, але я тут хутчэй пагаджуся з іншай пазіцыяй. – Такім чынам ён надзімае іх публічны імідж, робіць іх бачнымі настолькі, што чапаць іх будзе даволі небяспечна».