21 красавiка 2024, Нядзеля, 5:42
Падтрымайце
сайт
Сім сім,
Хартыя 97!
Рубрыкі

Выкладчык ВНУ, дзе вучыўся Лукашэнка: Позна піць баржомі

66
Выкладчык ВНУ, дзе вучыўся Лукашэнка: Позна піць баржомі

Павелічэнне тэрміну адпрацоўкі не спыніць уцёкі беларускіх студэнтаў.

Лукашэнка прапанаваў пашырыць практыку размеркавання студэнтаў: адпрацоўваць павінны і платнікі, а тэрміны размеркавання бюджэтнікаў трэба павялічыць з двух гадоў да пяці. Таксама беларускі дыктатар загаварыў аб «дрэнных кадрах» у сельскай гаспадарцы.

Сайт Charter97.org на ўмовах ананімнасці паразмаўляў з выкладчыкам Беларускай дзяржаўнай сельскагаспадарчай акадэміі — ВНУ, дзе вучыўся сам Лукашэнка.

- Ці мае рацыю Лукашэнка, калі кажа пра «дрэнныя кадры» ў сельскай гаспадарцы?

- Мае рацыю, але выправіць сітуацыю цяпер немагчыма. За апошні час прэстыж адукацыі ў гэтай сферы ўпаў настолькі, што мы набіралі на сельскагаспадарчай спецыяльнасці студэнтаў, непрыдатных да навучання.

Нікога не хачу пакрыўдзіць, але пра якую якасць спецыялістаў можна гаварыць, калі мы апусцілі планку прыёму настолькі, што бярэм абітурыентаў з аднымі атэстатамі. У нас нулявы конкурс на многія спецыяльнасці.

Разумныя, таленавітыя дзеці, на жаль, у сельскую гаспадарку не ідуць.

- Чаму?

- Нізкія заробкі і сістэма адпрацоўкі. Ніхто не жадае звязваць сваё жыццё з калгасамі, дзе няма ніякіх умоў працы. Вы ж бачыце гэтыя кадры з «абаср*нымі каровамі».

Многія пяцікурснікі плачуць, калі бачаць гаспадаркі, у якія іх размяркоўваюць. Тамака сапраўды бываюць проста жудасныя калгасы. На апошнім размеркаванні быў выпадак, калі дзяўчыну адправілі ў гаспадарку, якая знаходзіцца за дваццаць кіламетраў ад аўтамабільнай дарогі.

Разумею, што людзі самі выбіраюць для сябе сферу, у якой яны будуць працаваць, а ружамі ў сельскай гаспадарцы не пахне. Аднак гэта не рабства. Калі няма інфраструктуры і ўмоў для працы, нейкіх мінімальных рэчаў, патрэбных для годнага жыцця, то гэта не адпрацоўка, а катарга.

- Што вы думаеце аб прапанове ўвесці адпрацоўку і для платнікаў, а для бюджэтнікаў і мэтавікоў павысіць тэрмін?

- У нас проста не будзе платнікаў. Многія абітурыенты спецыяльна паступалі на платнае навучанне, каб пазбегнуць адпрацоўкі, некаторыя пераводзіліся з бюджэту.

У выніку страцяць ВНУ, бо платнікі нядрэнна іх «кармілі».

Мэтавікоў і бюджэтнікаў таксама стане менш. Пяць гадоў - гэта вялікі адрэзак часу. Чалавек дзесяць разоў падумае перад тым, як звязваць сябе нейкімі абавязацельствамі на такі працяглы тэрмін.

Думаю, многія спецыяльнасці ў маёй ВНУ можна будзе закрываць праз тое, што туды проста не набяруць студэнтаў.

Пакуль адкрытыя межы - нічога не выйдзе. Разумныя дзеці будуць паступаць на Захадзе, нехта разгледзіць ВНУ ў Расеі.

- Лукашэнка распякае жывёлаводаў за паморак жывёлы і дрэнныя вынікі, пагражае кіраўніцтву. Ці справядліва?

- Мы вельмі доўга ішлі да ямы, у якую наша сельская гаспадарка правалілася.

Жывёлагадоўля - дарагі працэс і калі гэтай справа якасна займацца, яна прыносіць добрыя грошы. Але ніколі калгаснік не будзе за гэтыя капейкі даглядаць і песціць кароў і цялят. Ён думае, як хутчэй адпрацаваць змену і пайсці ў краму па бутэльку.

Старшыня калгаса атрымлівае заробак, яму ўсё адно, стратная яго гаспадарка ці не. Стаўка аднолькавая, у яго няма адсотка ад прыбытку. Сістэма прагніла цалкам, тут ужо позна піць баржомі.

- Якія выхады з гэтай сітуацыі ёсць?

- Аддаць усё «жывое» нармальным прыватнікам. Будзе і разумны кантроль, зацікаўленасць, а з часам - добрыя заробкі ў работнікаў, інфраструктура на месцах.

Тут развязваецца і пытанне з кадрамі. Калі прыватнік будзе плаціць умоўнаму заатэхніку ці аграному тысячу даляраў, не трэба будзе трымаць студэнтаў у закладніках. Ёсць добрая прапанова - з'явіцца і попыт.

Напісаць каментар 66

Таксама сачыце за акаўнтамі Charter97.org у сацыяльных сетках