Жонку настаўніка Пуціна прыстрашылі пакараннем за паездку ў Еўропу

Яна, як сенатарка, дзейнічала насуперак рэгламенту.

72-гадовая ўдава Анатоля Сабчака і расейская сенатарка Людміла Нарусава летам адправілася ў турэцкі Стамбул, а адтуль - у французскую Ніцу. Аднак, як піша УНІАН са спасылкай на расейскае прапагандысцкае агенцтва РІА «Новости», гэтую паездку сенатарка не ўзгадніла з камітэтам Савета Федэрацыі па рэгламенце і арганізацыі парламенцкай дзейнасці. За паездку ў краіну NATO без узгаднення палітыку вынеслі папярэджанне.

«Нарусава прапусціла пленарнае пасяджэнне», - падкрэсліў кіраўнік камітэта па рэгламенце Савета Федэрацыі Вячаслаў Цімчанка, каменціруючы летнюю паездку калегі. Сама Нарусава заявіла, што «фэйкі не каментуе».

Раней таксама ўсплывала інфармацыя аб паездцы Нарусавай у Гішпанію - пасля таго, як яна «засвяцілася» на відэа сваёй дачкі, палітыка і журналісткі Ксеніі Сабчак з Еўропы.

Што звязвае сям'ю Сабчака з Пуціным

Загінулага ў 2000 годзе ў аўтакатастрофе Анатоля Сабчака, першага мэра Санкт-Пецярбурга і аднаго з суаўтараў Канстытуцыі Расейскай Федэрацыі, уважаюць палітычным настаўнікам расейскага дыктатара Уладзіміра Пуціна.

У 1989 годзе Сабчак быў абраны дэпутатам Ленінградскай гарадской рады народных дэпутатаў. У 1990 годзе абраны старшынём Ленсавета, а ў 1991 годзе - мэрам Санкт-Пецярбурга. З Уладзімірам Пуціным Сабчак пазнаёміўся ў 1990 годзе, калі Пуцін быў прызначаны на пасаду намесніка старшыні Ленсавета. Сабчак дапамог Пуціну зрабіць кар'еру ў палітычнай сферы. Уплыў на сябе Сабчака публічна прызнаваў і сам расейскі дыктатар. Пасля смерці Сабчака Пуцін часта згадваў яго ў сваіх выступах, называючы яго «вялікім расейскім палітычным дзеячам» і «адным з заснавальнікаў сучаснай Расеі».

Абмежаванне паездак расейскіх палітыкаў у «недружалюбныя краіны»

У пачатку 2023 г. у расейскіх СМІ шырока абмяркоўваўся адпачынак за мяжой мясцовых дэпутатаў.

На гэтым фоне ў расейскім парламенце абавязалі дэпутатаў апавяшчаць аб паездках за мяжу, калі размова не ідзе аб камандзіроўках. Цяпер пра ўсе паездкі, за выключэнне здзейсненых на загад спікера Думы, неабходна апавяшчаць загадзя.