Прадпрыемства адмовіла беларусу ў звальненні да канца гадавога кантракту

Той пайшоў у суд - і перамог.

Мужчына ўладкаваўся на адно з менскіх прадпрыемстваў ізаліроўшчыкам і падпісаў гадавы кантракт, які пачаў дзейнічаць з 1 студзеня 2023 года. А калі захацеў звольніцца да яго заканчэння, атрымаў адмову. Давялося ісці ў суд - на тое, чым ён скончыўся, звярнуў увагу Onliner.

Праз некалькі месяцаў пасля пачатку працы мужчына захацеў звольніцца праз праблемы са здароўем у ягонай маці, якая жыла ў іншым горадзе, і ёй патрабавалася дапамога. Але прадпрыемства адмовіла свайму работніку ў звальненні. Той не пагадзіўся з гэтым і пайшоў у суд.

У сваю чаргу суд стаў на бок мужчыны і пастанавіў, што кантракт павінен быць скасаваны датэрмінова. Падставай такой пастановы стаў артыкул 41 Працоўнага кодэкса, які дазваляе зрабіць гэта на патрабаванне супрацоўніка, калі ў яго ёсць уважлівая прычына, якая замінае выконваць свае абавязкі.

Уважлівай прычынай у выпадку ізаліроўшчыка сталі сямейныя абставіны. Суд вывучыў, як ходзіць грамадскі транспарт ад прадпрыемства да месца жыхарства маці мужчыны, і зрабіў выснову, што жыць у яе і дабірацца да працы немагчыма. Пры гэтым прадпрыемства-наймальнік, паводле тлумачэнняў бакоў, не прапанавала свайму супрацоўніку змяніць працоўны час.