Пяхота УСУ прарвала расейскую абарону з «зубамі цмока» на захад ад Вярбовага

Украінскае войска павялічыла пралом у галоўным абарончым эшалоне ворага на Поўдні.

Лёгкая пяхота Сіл абароны Украіны прасунулася да пазіцый за супрацьтанкавымі равамі і «зубамі цмока», якія складаюць цяперашнюю абарончую мяжу акупантаў у заходняй частцы Запарожскай вобласці. І хоць пакуль размова не ідзе аб прарыве гэтай лініі абароны ворага, бо там не назіраецца цяжкай тэхнікі УСУ, відавочна, што яны мерацца ўтрымліваць пазіцыі.

Акупанты спрабавалі павялічыць свае мінныя палі на поўдні пасля пачатку ўкраінскага контрнаступу ў чэрвені, але яны гэта не здалелі. А цяпер абмежаванні магчымасцяў расейскай артылерыі і перавагі ўкраінцаў у контрбатарэйным агні змушаюць расейцаў адхіляцца ад уласнай дактрыны, гаворыцца ў справаздачы Інстытута вывучэння вайны.

Прасоўванне УСУ на Запарожжа

Са слоў аналітыкаў, у часе наступальнай аперацыі ўкраінскія войскі рушылі да пазіцый захопнікаў, размешчаным на мяжы дрэў, якія знаходзяцца на ўсход ад супрацьтанкавых равоў і загарод у выглядзе «зубоў цмока», якія з'яўляюцца часткай трохузроўневай лініі абароны УС РФ беспасярэдне на захад ад Вярбовага.

Таксама ўкраінская лёгкая пяхота прасунулася далей да шэрагу падрыхтаваных расейскіх абарончых пазіцый уздоўж дарогі, якая вядзе на паўночны захад у Вярбовае.

Акрамя таго, УСУ наблізіліся да расейскіх абарончых пазіцый паміж Рабоцінам і Новапракопаўкай.

Эксперты адзначылі, што ўкраінскія сілы павялічваюць пралом, які ўжо прарабілі ў адным расейскім абарончым эшалоне, і перакідваюць больш тэхнікі і асабовага складу ў тактычныя тылы гэтага звяна.

«Здаецца, яны дамагаюцца поспехаў паблізу ад расейскай абарончай мяжы, што праходзіць на паўночны захад ад Вярбовага і на поўнач ад Салодкай Балкі, пры гэтым праводзячы пяхотныя атакі і цяжкі артылерыйскі агонь па варожых пазіцыях углыб і на поўдзень ад гэтага пласта. Разгортванне ўкраінскай цяжкай тэхнікі і больш значных сіл у гэтых абшарах, якога яшчэ не назіралася, будзе паказваць як на прарыў у гэтым расейскім абарончым пласце, так і на спробу павялічыць прасоўванне», — адзначылі ў ISW.

У войскаў РФ нарастаюць праблемы

Са слоў экспертаў з Каралеўскага аб'яднанага інстытута абаронных даследаванняў (RUSI), абмежаванні магчымасцяў расейскай артылерыі і перавагі Украіны ў контрбатарэйным агні змушаюць акупацыйныя войскі РФ адхіляцца ад уласнай агнявой дактрыны. Хаця захопнікі спрабавалі адаптаваць яе яшчэ да пачатку ўкраінскіх контрнаступальных аперацый.

У RUSI адзначылі, што расейскія войскі спрабуюць аддаць прыярытэт дакладнасці ўдару, а не аб'ёму, бо ім не стае баявых прыпасаў для падтрымання дактрынальна пазначанага артылерыйскага агню. Яшчэ яны адчуваюць цяжкасці з транспартаваннем вялікай колькасці баявых прыпасаў ля перадавой лініі ды бачаць зніжэнне эфектыўнасці масавых удараў пры страце контрбатарэйных радараў, а іхнія гарматы цярпяць ад спрацаванасці руль.

Эксперты кажуць, што расейскія войскі спрабуюць павялічыць выраб набояў з лазерным навядзеннем «Краснопаль» і выкарыстаннем дронаў «Ланцэт» з мэтай павышэння дакладнасці і скарачэння колькасці баявых прыпасаў, якія выкарыстоўваюцца ў атаках.

Таксама акупанты часта рыхтуюць свае баявыя пазіцыі да дыстанцыйнага разбурэння з дапамогай самаробнай выбухоўкі замест таго, каб наносіць артылерыйскія ўдары па іх пасля вываду войскаў, як таго патрабуе расейская дактрына.

Ацаніўшы гэтыя змены, у ISW выказалі меркаванне, што скарачэнне магчымасцяў расейскай артылерыі можа яшчэ больш аслабіць абарону войска РФ на пэўных дзялянках фронту, бо артылерыйскі агонь з'яўляецца найважнейшым кампанентам расейскай эластычнай абароны. Пераход акупантаў да больш дакладнай дактрыны агню можа дазволіць ім узмацніць гэтыя магчымасці, але абмежаванні ў навучальным патэнцыяле дзяржавы-агрэсара, імаверна, не дазволяць ворагу рэалізаваць гэты зрух у шырокім маштабе ў найбліжэйшай будучыні. Бо з самага пачатку контрнаступу УСУ расейскія крыніцы ўвесь час заяўлялі, што войскі дыктатара Уладзіміра Пуцін не маюць дастатковых контрбатарэйных магчымасцяў на розных дзялянках фронту.

На фоне гэтага камандзір выведнага цэнтра Сіл абароны Эстоніі палкоўнік Марго Гросбэрг заявіў, што ўкраінскія артылерыйскія магчымасці "роўныя або нават лепшыя", чым у расейскіх войскаў, і што УСУ змаглі адкінуць варожыя артылерыйскія падраздзяленні ад лініі фронту, не дазваляючы ім падтрымліваць асноўныя войскі ворага.