Вядомая беларуская тэнісістка абвясціла аб завяршэнні спартыўнай кар'еры

Яна падтрымала пратэсты ў 2020 годзе.

Вядомая беларуская тэнісістка Вера Лапко паведаміла аб тым, што прыняла рашэнне скончыць прафесійную спартыўную карʼеру. Пра гэта яна напісала ў Instagram 13 студзеня.

«Доўга думаючы, узважваючы ўсе «за« і «супраць«, я прыняла рашэнне аб завяршэнні карʼеры. Так, гэта самае правільнае рашэнне, і пасля яго прыняцця я адчуваю сябе лёгка… І гэта не сумны допіс. Так, мне прыйшлося прайсці праз мноства цяжкасцяў, але за час карʼеры са мной здарылася і шмат добрага. Я шчыра люблю гэты від спорту і шмат што яму аддала. Ён даў мне паспяховую карʼеру, фінансавую незалежнасць, неацэнныя ўрокі жыцця, магчымасць абʼездзіць паўсвету і, вядома ж, пазнаёміў мяне з маім трэнерам, мужам і проста каханым чалавекам», – распавяла тэнісістка.

Вера Лапко стала пераможцай аднаго юніёрскага турніру Вялікага шлема ў адзіночным разрадзе (Адкрыты чэмпіянат Аўстраліі-2016), фіналісткай двух юніёрскіх турніраў Вялікага шлема ў парным разрадзе (Адкрыты чэмпіянат ЗША-2014, Уімблдон-2015); была былой першай ракетка свету ў юніёрскім рэйтынгу.

Да кастрычніка 2018 года яна дасягнула найвышэйшай для сябе пазіцыі ў «дарослым» сусветным рэйтынгу ВТА – 60-й.

Як узгадваў аўтарытэтны тэнісны журналіст Бэн Ратэнберг, Вера Лапко стала адзінай беларускай тэнісісткай, якая выказалася пасля выбараў 2020 года і асудзіла гвалт: «Там было шмат людзей. Усе мірна настроеныя. Людзі радаваліся магчымасці выказаць сваё меркаванне і эмоцыі наконт таго, што адбываецца».